Fact Check: ಬಿಹಾರದ ಯುವಕ ಸ್ಕ್ರ್ಯಾಪ್‌ನಿಂದ ವಿಮಾನ ನಿರ್ಮಿಸಿದ್ದಾನೆಯೇ? ಇಲ್ಲ, ಇದು ಬಾಂಗ್ಲಾದೇಶದ ವೀಡಿಯೊ

ಬಿಹಾರದ ಮುಜಫರ್‌ಪುರದ ಅವನೀಶ್ ಕುಮಾರ್ ಎಂಬ ಹುಡುಗ ಸ್ಕ್ರ್ಯಾಪ್ ವಸ್ತುಗಳನ್ನು ಮತ್ತು ಕೇವಲ 7,000 ರೂ. ಖರ್ಚು ಮಾಡಿ ವಿಮಾನವನ್ನು ನಿರ್ಮಿಸಿದ್ದಾರೆ ಎಂದು ಆನ್‌ಲೈನ್‌ನಲ್ಲಿ ವೀಡಿಯೊವೊಂದು ವೈರಲ್ ಆಗುತ್ತಿದೆ. ಈ ಕ್ಲಿಪ್‌ನಲ್ಲಿ ಸಣ್ಣ ವಿಮಾನವೊಂದು ನೆಲದಿಂದ ಮೇಲಕ್ಕೆ ಹಾರುವುದನ್ನು ಕಾಣಬಹುದು.

ಫೇಸ್​ಬುಕ್ ಬಳಕೆದಾರರೊಬ್ಬರು ಈ ವೀಡಿಯೊವನ್ನು ಹಂಚಿಕೊಂಡು, ‘‘ಬಿಹಾರದ ಮುಜಾಫರ್ ನಗರ ನಿವಾಸಿ ಅವನೀಶ್ ಕುಮಾರ್ ಎಂಬ ಹುಡುಗನೊಬ್ಬ, ಗುಜರಿ ವಸ್ತುಗಳನ್ನು ಬಳಸಿ ಕೇವಲ 7000/ ರೂ. ಖರ್ಚಿನಲ್ಲಿ ವಿಮಾನವೊಂದನ್ನು ತಯಾರಿಸಿದ್ದಾನೆ. ಮತ್ತು 300 ಅಡಿಗಳವರೆಗೆ ಪರೀಕ್ಷಾರ್ಥ ಹಾರಾಟ ನಡೆಸಿ ಯಶಸ್ವಿಯಾಗಿ ಲ್ಯಾಂಡ್ ಮಾಡಿದ್ದಾನೆ. ತಾಂತ್ರಿಕ ಅನುಭವ ಇಲ್ಲದ ಬಾಲಕನೊಬ್ಬ ವಿಮಾನ ತಯಾರಿಸಿರುವುದು ಈಗ ವಿಜ್ಞಾನಿಗಳ ಗಮನ ಸೆಳೆದಿದೆ’’ ಎಂದು ಬರೆದುಕೊಂಡಿದ್ದಾರೆ. (Archive)

ಇದೇರೀತಿಯ ಹೇಳಿಕೆಯೊಂದಿಗೆ ವೈರಲ್ ಆಗುತ್ತಿರುವ ವೀಡಿಯೊವನ್ನು ನೀವು ಇಲ್ಲಿ, ಇಲ್ಲಿ ನೋಡಬಹುದು.

Fact Check:

ಈ ಸುದ್ದಿಯ ಸತ್ಯಾಸತ್ಯತೆಯನ್ನು ನ್ಯೂಸ್ ಮೀಟರ್ ಪರಿಶೋದಿಸಿದಾಗ ಸುಳ್ಳು ಹೇಳಿಕೆಯೊಂದಿಗೆ ಈ ವೀಡಿಯೊ ವೈರಲ್ ಆಗುತ್ತಿದೆ ಎಂಬುದು ಕಂಡುಬಂದಿದೆ. ಈ ವೈರಲ್ ವೀಡಿಯೊ ಬಿಹಾರ ಅಥವಾ ಭಾರತಕ್ಕೆ ಯಾವುದೇ ಸಂಬಂಧವಿಲ್ಲ, ಇದು ಬಾಂಗ್ಲಾದೇಶದಿಂದ ಬಂದಿದೆ.

ನಿಜಾಂಶವನ್ನು ತಿಳಿಯಲು ನಾವು ವೈರಲ್ ವೀಡಿಯೊದ ಪ್ರಮುಖ ಕೀ ಫ್ರೇಮ್​ಗಳನ್ನು ಗೂಗಲ್ ಲೆನ್ಸ್ ಸಹಾಯದಿಂದ ಹುಡುಕಿದ್ದೇವೆ. ಈ ಸಂದರ್ಭ ಮಾರ್ಚ್ 9, 2025 ರಂದು @krisantv2020 ಎಂಬಫೇಸ್‌ಬುಕ್ ಪೋಸ್ಟ್‌ ನಮಗೆ ಸಿಕ್ಕಿತು. ಉತ್ತಮ ಕ್ವಾಲಿಟಿಯ ಅದೇ ವೈರಲ್ ವೀಡಿಯೊವನ್ನು ಹೊಂದಿರುವ ಈ ಪೋಸ್ಟ್, "ರೈತನ ಮಗ ಜುಲ್ಹಾಸ್‌ನ ವಿಮಾನವು ಸಾವಿರಾರು ಜನರ ಮುಂದೆ ಆಕಾಶಕ್ಕೆ ಹಾರಿತು (Google ಮೂಲಕ ಬಂಗಾಳಿ ಭಾಷೆಯಿಂದ ಅನುವಾದಿಸಲಾಗಿದೆ)" ಎಂದು ಬರೆಯಲಾಗಿದೆ.

ಇದರಿಂದ ಸುಳಿವು ಪಡೆದು, ಗೂಗಲ್‌ನಲ್ಲಿ ಸಂಬಂಧಿತ ಕೀವರ್ಡ್‌ಗಳ ಮೂಲಕ ಹುಡುಕಿದೆವು. ಈ ಸಂದರ್ಭ ಮಾರ್ಚ್‌ನಲ್ಲಿ ಬಾಂಗ್ಲಾದೇಶದ ಮಾಧ್ಯಮಗಳು ಪ್ರಕಟಿಸಿದ ಬಹು ವರದಿಗಳು ಕಂಡವು. ಮಾರ್ಚ್ 6, 2025 ರಂದು ದಿ ಡೈಲಿ ಸ್ಟಾರ್ ವರದಿಯ ಪ್ರಕಾರ, ‘‘ಈ ವಿಮಾನವನ್ನು ಮಾರ್ಚ್ 4, 2025 ರಂದು ಮಾಣಿಕ್‌ಗಂಜ್‌ನ ಶಿಬಲಾಯ ಉಪಜಿಲ್ಲೆಯ ಜಾಫರ್‌ಗಂಜ್ ಗ್ರಾಮದಲ್ಲಿ ನಿರ್ಮಿಸಲಾಯಿತು ಮತ್ತು ಹಾರಿಸಲಾಯಿತು. ಇದರ ಸೃಷ್ಟಿಕರ್ತ ಜುಲ್ಹಾಸ್ ಮೊಲ್ಲಾ, 28 ವರ್ಷದ ಮೆಕ್ಯಾನಿಕ್ ಕಾಲೇಜು ಬಿಟ್ಟವರಾಗಿದ್ದು, ಅವರು ನಾಲ್ಕು ವರ್ಷಗಳಲ್ಲಿ ಸುಮಾರು 8 ಲಕ್ಷ ಟಾಕಾಗಳನ್ನು ಖರ್ಚು ಮಾಡಿ ವಿಮಾನವನ್ನು ನಿರ್ಮಿಸಿದರು. ಇದು 100 ಕೆಜಿಗಿಂತ ಹೆಚ್ಚು ತೂಕವಿದೆ, ಅಲ್ಯೂಮಿನಿಯಂ, ಸ್ಟೇನ್‌ಲೆಸ್ ಸ್ಟೀಲ್ ಮತ್ತು ಕಬ್ಬಿಣವನ್ನು ಬಳಸಿ ತಯಾರಿಸಲ್ಪಟ್ಟಿದ್ದು ಸುರಕ್ಷಿತವಾಗಿ ಇಳಿಯುವ ಮೊದಲು ಸುಮಾರು 50 ಅಡಿ ಎತ್ತರಕ್ಕೆ ಯಶಸ್ವಿಯಾಗಿ ಏರಿತು. ಇದು ಡಿಜಿಟಲ್ ಸ್ಪೀಡೋಮೀಟರ್‌ನೊಂದಿಗೆ ಅಳವಡಿಸಲ್ಪಟ್ಟಿದ್ದು, 7-ಅಶ್ವಶಕ್ತಿಯ ವಾಟರ್ ಪಂಪ್ ಎಂಜಿನ್‌ನಿಂದ ಚಾಲಿತವಾಗಿದೆ’’ ಎಂಬ ಮಾಹಿತಿ ಇದರಲ್ಲಿದೆ.

Prothom Alo ಮಾರ್ಚ್ 5 ರಂದು ವೀಡಿಯೊ ವರದಿಯನ್ನು ಬಿತ್ತರಿಸಿದ್ದು, ಯೂಟ್ಯೂಬ್ ಟ್ಯುಟೋರಿಯಲ್‌ಗಳಿಂದ ಪ್ರೇರಿತರಾಗಿ ಜುಲ್ಹಾಸ್ ವಾಯುಯಾನ ಯೋಜನೆಗಳೊಂದಿಗೆ ಪ್ರಯೋಗ ಮಾಡಲು ಪ್ರಾರಂಭಿಸಿದರು. 2024 ರಲ್ಲಿ ಮಾನವಸಹಿತ ಹಾರಾಟದ ಅವರ ಮೊದಲ ಪ್ರಯತ್ನ ಕೇವಲ 10-12 ಅಡಿಗಳನ್ನು ತಲುಪಿತು. ಅವರ ವಿನ್ಯಾಸವನ್ನು ಪರಿಷ್ಕರಿಸಿದ ನಂತರ, ಅವರು 2025 ರಲ್ಲಿ ಯಶಸ್ವಿ ಹಾರಾಟವನ್ನು ಸಾಧಿಸಿದರು ಎಂದು ಹೇಳಲಾಗಿದೆ.

ಜುಲ್ಹಾಸ್ ಮೂರು ವರ್ಷಗಳ ಸಂಶೋಧನೆಯಲ್ಲಿ ಮತ್ತು ಇನ್ನೊಂದು ವರ್ಷ ವಿಮಾನವನ್ನು ನಿರ್ಮಿಸಲು ಕಳೆದರು ಮತ್ತು ಅದಕ್ಕಾಗಿ ಸುಮಾರು 8 ಲಕ್ಷ ಟಾಂಕಾ ಖರ್ಚು ಮಾಡಿದರು. ಬಾಂಗ್ಲಾದೇಶ ರಾಷ್ಟ್ರೀಯ ಪಕ್ಷದ (ಬಿಎನ್‌ಪಿ) ಸ್ಥಳೀಯ ನಾಯಕರು ಅವರ ಯೋಜನೆಯನ್ನು ಶ್ಲಾಘಿಸಿದರು ಮತ್ತು ಆರ್ಥಿಕ ನೆರವು ನೀಡಿದರು ಎಂದು ದಿ ಫೈನಾನ್ಷಿಯಲ್ ಪೋಸ್ಟ್ ವರದಿ ಮಾಡಿದೆ.

ಢಾಕಾ ಟ್ರಿಬ್ಯೂನ್, ಚಾನೆಲ್ 24 ಮತ್ತು ಎಟಿಎನ್ ಬಾಂಗ್ಲಾ ನ್ಯೂಸ್ನಂತಹ ಹಲವಾರು ಇತರ ಮಾಧ್ಯಮಗಳು ಜುಲ್ಹಾಸ್ ವಿಮಾನವನ್ನು ಹಾರಿಸುವುದನ್ನು ತೋರಿಸುವ ವೀಡಿಯೊಗಳನ್ನು ಹಂಚಿಕೊಂಡಿವೆ. ಜುಲ್ಹಾಸ್ ಯೂಟ್ಯೂಬ್ ಚಾನೆಲ್ ಅನ್ನು ಸಹ ನಡೆಸುತ್ತಾರೆ, ಅಲ್ಲಿ ಅವರು ಅಲ್ಟ್ರಾ ಲೈಟ್ ವಿಮಾನಗಳ ಬಗ್ಗೆ ಮಾಹಿತಿಯನ್ನು ಹಂಚಿಕೊಂಡಿದ್ದಾರೆ.

ಹೀಗಾಗಿ ಈ ಎಲ್ಲ ಮಾಹಿತಿಯ ಆಧಾರದ ಮೇಲೆ, ಬಿಹಾರದ ಹದಿಹರೆಯದವನೊಬ್ಬ ಒಂದು ವಾರದಲ್ಲಿ ಸ್ಕ್ರ್ಯಾಪ್ ವಸ್ತುಗಳಿಂದ ವಿಮಾನವನ್ನು ನಿರ್ಮಿಸಿದ್ದಾನೆ ಎಂದು ಆರೋಪಿಸುತ್ತಿರುವ ವೈರಲ್ ಪೋಸ್ಟ್‌ಗಳು ಸುಳ್ಳು ಎಂದು ನಾವು ಖಚಿತವಾಗಿ ಹೇಳುತ್ತೇವೆ. ಇದು ಬಾಂಗ್ಲಾದೇಶದ ವೀಡಿಯೊ ಆಗಿದೆ.