Fact Check: ಭಾರತ ಸರ್ಕಾರವು ಎಲ್ಲಾ ಭಾರತೀಯರ ಖಾತೆಗಳಿಗೆ 5000 ರೂ. ನೀಡುತ್ತಿದೆ ಎಂಬುದು ನಿಜವೇ?

ಭಾರತ ಸರ್ಕಾರವು ಎಲ್ಲಾ ಭಾರತೀಯರ ಖಾತೆಗಳಿಗೆ ಐದು ಸಾವಿರ ರೂಪಾಯಿ ನೀಡುತ್ತಿದೆ ಎಂಬ ಹೇಳಿಕೆಯೊಂದು ಪೋಸ್ಟ್ ಒಂದು ಸಾಮಾಜಿಕ ಜಾಲತಾಣಗಳಲ್ಲಿ ಕಂಡುಬಂದಿದೆ. ಕ್ಯಾಶ್​ ವ್ಯಾಲೆಂಟ್ ಎಂಬ ಫೇಸ್‌ಬುಕ್ ಪುಟದಲ್ಲಿ ಫೋನ್ ಪೇ ಸೇರಿದಂತೆ ಕೆಲವು ಯುಪಿಐ ಪಾವತಿ ಆ್ಯಪ್​ಗಳ ಲೋಗೋವನ್ನು ಹಂಚಿಕೊಂಡ ಸಂದೇಶದ ಜೊತೆಗೆ ಒದಗಿಸಿದ ಲಿಂಕ್ ಅನ್ನು ಕ್ಲಿಕ್ ಮಾಡುವ ಮೂಲಕ ಹಣ ಪಡೆಯಬಹುದು. ಜೊತೆಗೆ 500 ರೂ. ಕ್ಯಾಶ್​ಬ್ಯಾಕ್ ಕೂಡ ಪಡೆಯಿರಿ ಎಂದು ಬರೆಯಲಾಗಿದೆ. ಅಲ್ಲದೆ ಈ ಫೋಟೋದಲ್ಲಿ ಕರ್ನಾಟಕದ ಮುಖ್ಯಮಂತ್ರ ಸಿದ್ದರಾಮಯ್ಯ ಅವರ ಫೋಟೋ ಕೂಡ ಇದೆ.

Fact Check:

ಈ ಸುದ್ದಿಯ ಸತ್ಯಾಸತ್ಯತೆಯನ್ನು ನ್ಯೂಸ್ ಮೀಟರ್ ಪರಿಶೋದಿಸಿದಾಗ ಇದು ಆಧಾರ ರಹಿತವಾಗಿದ್ದು, ಹಣಕಾಸು ವಂಚನೆಗೆ ಗುರಿಯಾಗಿರುವ ಲಿಂಕ್ ಅನ್ನು ಹಂಚಿಕೊಳ್ಳಲಾಗಿದೆ ಎಂದು ತಿಳಿದುಬಂದಿದೆ.

ಈ ಲಿಂಕ್ ಅನ್ನು ನಾವು ತಪಾಸಣೆ ನಡೆಸಿದ್ದು, ಚಲಾವಣೆಯಲ್ಲಿರುವ ವೆಬ್‌ಸೈಟ್ ಯಾವುದೇ ಅಧಿಕೃತ ಮಾಹಿತಿಯನ್ನು ಹೊಂದಿಲ್ಲ ಮತ್ತು ವಂಚನೆಯ ಗುರಿಯನ್ನು ಹೊಂದಿರುವ ನಕಲಿ ಲಿಂಕ್ ಎಂದು ಸ್ಪಷ್ಟವಾಗಿದೆ. ಚಲಾವಣೆಯಲ್ಲಿರುವ ಲಿಂಕ್ ಅನ್ನು ಕ್ಲಿಕ್ ಮಾಡಿದಾಗ, ಬರುವ ವೆಬ್‌ಸೈಟ್‌ನಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ ಚಿತ್ರ ಮತ್ತು ಯುಪಿಐ ಸೇರಿದಂತೆ ಕೆಲವು ಲೋಗೊಗಳನ್ನು ನೀಡಿರುವುದು ಕಂಡುಬರುತ್ತದೆ. ಆದರೆ URL https://cashzoneofferzz.dev/PAYM/index.html ಇದು ನಕಲಿ ಪುಟ ಎಂದು ಖಚಿತಪಡಿಸುತ್ತದೆ.

ನೀವು ಪುಟವನ್ನು ಕೆಳಗೆ ಸ್ಕ್ರಾಲ್ ಮಾಡುವಾಗ ನೀವು ಸ್ಕ್ರ್ಯಾಚ್ ಬಟನ್ ಅನ್ನು ನೋಡುತ್ತೀರಿ. ನಂತರ ಕೆಲವು ಕೊಡುಗೆಗಳನ್ನು ಕಾಣಬಹುದು. ಸ್ಕ್ರಾಚಿಂಗ್​ನೊಂದಿಗೆ ನಿರ್ದಿಷ್ಟ ಮೊತ್ತವು ಅದರ ಮೇಲೆ ಕಾಣಿಸಿಕೊಳ್ಳುತ್ತದೆ. ಈ ಮೊತ್ತವನ್ನು ಪಡೆಯಲು ಕ್ಲಿಕ್ ಮಾಡಬೇಕಾದ ಇನ್ನೊಂದು ಬಟನ್ ಅನ್ನು ನೀವು ನೋಡುತ್ತೀರಿ.

ಬಳಿಕ ಖಾತೆಗೆ ಹಣವನ್ನು ಹಿಂಪಡೆಯುವ ಭರವಸೆಯೊಂದಿಗೆ ಒದಗಿಸಿದ ಲಿಂಕ್‌ನ ವಿವರಗಳನ್ನು ಪರಿಶೀಲಿಸಿದ್ದೇವೆ. ಪಾವತಿ ಅಪ್ಲಿಕೇಶನ್ PhonePay ಗೆ ಲಿಂಕ್ ಅನ್ನು ಒದಗಿಸಲಾಗಿದೆ. ಇದು ನಿಗದಿತ ಮೊತ್ತವನ್ನು ಮೊದಲೇ ಹೊಂದಿಸಿರುವ ಖಾತೆಗೆ ವರ್ಗಾಯಿಸುವ ಲಿಂಕ್ ಆಗಿದೆ. ಅಂದರೆ, ಹಣವನ್ನು ಸ್ವೀಕರಿಸಲು ಅಲ್ಲ, ಹಣವನ್ನು ನಾವೇ ನೀಡುವ ಲಿಂಕ್ ಅನ್ನು ಪುಟಕ್ಕೆ ಸೇರಿಸಲಾಗಿದೆ.

ಈ ಲಿಂಕ್ ಫೋನ್‌ಪೇ ಅಪ್ಲಿಕೇಶನ್‌ನೊಂದಿಗೆ ಫೋನ್‌ಗಳಲ್ಲಿನ ವಹಿವಾಟಿನ ಪುಟಕ್ಕೆ ನೇರವಾಗಿ ಲಿಂಕ್ ಆಗಿದೆ. ಇದನ್ನು ನಂಬಿ ಜನರು ಮೋಸಹೋಗಬಹುದು. ವಿಕಾಸ್ ಎಂಟರ್‌ಪ್ರೈಸಸ್‌ನ ಪೇಟಿಎಂ ಖಾತೆಗೆ ಹಣ ವರ್ಗಾವಣೆಯಾಗುತ್ತಿರುವುದನ್ನು ಸಹ ಇಲ್ಲಿ ಕಾಣಬಹುದು.

ಹೀಗಾಗಿ ಈ ಎಲ್ಲ ತನಿಖೆಯಿಂದ, ಭಾರತ ಸರ್ಕಾರವು ಎಲ್ಲಾ ಭಾರತೀಯರ ಖಾತೆಗಳಿಗೆ 5000 ರೂ. ನೀಡುತ್ತಿದೆ, ಈ ಲಿಂಕ್ ಕ್ಲಿಕ್ ಮಾಡಿ ಎಂಬ ಪೋಸ್ಟ್ ಆರ್ಥಿಕ ವಂಚನೆಗೆ ಗುರಿಯಾಗಿರುವ ಹುಸಿ ಪ್ರಚಾರ ಎಂಬುದು ದೃಢಪಟ್ಟಿದೆ.