Fact Check: ಇರಾನ್ ಜೊತೆಗಿನ ಯುದ್ಧವನ್ನು ನಿಲ್ಲಿಸಿ ಎಂದು ಇಸ್ರೇಲಿಗರು ಪ್ರತಿಭಟಿಸಿದರೇ?, ಸತ್ಯ ಇಲ್ಲಿ ತಿಳಿಯಿರಿ
ಈ ವೀಡಿಯೊದಲ್ಲಿ, ಜನರು ಇಸ್ರೇಲಿ ಧ್ವಜಗಳನ್ನು ಬೀಸುತ್ತಾ "ಯುದ್ಧ ನಿಲ್ಲಿಸಿ. ಇರಾನ್, ನಮ್ಮನ್ನು ಕ್ಷಮಿಸಿ. ನಮಗೆ ಶಾಂತಿ ಬೇಕು!" ಎಂದು ಘೋಷಣೆ ಕೂಗುತ್ತಿರುವುದನ್ನು ಕಾಣಬಹುದು.
By Vinay Bhat
Claim:ಇರಾನ್ ಜೊತೆಗಿನ ಯುದ್ಧವನ್ನು ನಿಲ್ಲಿಸಿ ಎಂದು ಇಸ್ರೇಲಿಗಳು ಪ್ರತಿಭಟನೆ ಮಾಡುತ್ತಿರುವುದನ್ನು ವೀಡಿಯೊ ತೋರಿಸುತ್ತದೆ.
Fact:ಹಕ್ಕು ಸುಳ್ಳು. ಇದು ಕೃತಕ ಬುದ್ದಿಮತ್ತೆಯಿಂದ ರಚಿಸಿದ ವೀಡಿಯೊ ಆಗಿದೆ.
ಇರಾನ್ ಮತ್ತು ಇಸ್ರೇಲ್ ನಡುವಿನ ಸಂಘರ್ಷದ ಮಧ್ಯೆ ವೀಡಿಯೊ ಒಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ. ಈ ವೀಡಿಯೊದಲ್ಲಿ, ಜನರು ಇಸ್ರೇಲಿ ಧ್ವಜಗಳನ್ನು ಬೀಸುತ್ತಾ "ಯುದ್ಧ ನಿಲ್ಲಿಸಿ. ಇರಾನ್, ನಮ್ಮನ್ನು ಕ್ಷಮಿಸಿ. ನಮಗೆ ಶಾಂತಿ ಬೇಕು!" ಎಂದು ಘೋಷಣೆ ಕೂಗುತ್ತಿರುವುದನ್ನು ಕಾಣಬಹುದು.
ಫೇಸ್ಬುಕ್ ಬಳಕೆದಾರರೊಬ್ಬರು ಈ ವೀಡಿಯೊವನ್ನು ಹಂಚಿಕೊಂಡು, ‘‘ಕ್ಷಮಿಸಿ ಅಂದ ಮೇಲೆ ಕ್ಷಮಿಸುವುದು ಮಾನವ ಧರ್ಮ. ಇಸ್ರೇಲ್ ಜನಗಳು ಜಾಗ್ರುತರಾಗಿದ್ದಾರೆ, ಅಲ್ಲಿಯ ಪ್ರಧಾನ ಮಂತ್ರಿಯನ್ನು ದಿಕ್ಕರಿಸಿ ಜನರು ಯುದ್ಧ ನಿಲ್ಲಿಸಿ, ನಮ್ಮಿಂದ ತಪ್ಪಾಗಿದೆ ಎಂದು ಹೇಳುತಿದ್ದಾರೆ. ಆದರೆ ಅಲ್ಲಿಯ ಸರ್ವಾಧಿಕಾರಿ ಬೆಂಜಮಿನ್ ನಿತಿನಯ್ಯಾಹು ಮಾತ್ರ ಕ್ಷಮೆ ಕೆಳುತ್ತಿಲ್ಲ’’ ಎಂದು ಬರೆದುಕೊಂಡಿದ್ದಾರೆ. (Archive)
Fact Check:
ಈ ಸುದ್ದಿಯ ಸತ್ಯಾಸತ್ಯತೆಯನ್ನು ನ್ಯೂಸ್ ಮೀಟರ್ ಪರಿಶೋದಿಸಿದಾಗ ಸುಳ್ಳು ಹೇಳಿಕೆಯೊಂದಿಗೆ ಈ ವೀಡಿಯೊ ವೈರಲ್ ಆಗುತ್ತಿದೆ ಎಂಬುದು ಕಂಡುಬಂದಿದೆ. ಈ ವೀಡಿಯೊ ನಿಜವಲ್ಲ, ಬದಲಾಗಿ ಇದನ್ನು ಕೃತಕ ಬುದ್ದಿಮತ್ತೆಯಿಂದ ರಚಿಸಲಾಗಿದೆ.
ವೈರಲ್ ವೀಡಿಯೊವನ್ನು ಸೂಕ್ಷ್ಮವಾಗಿ ವಿಶ್ಲೇಷಿಸಿದಾಗ, AI- ರಚಿತವಾದ ವಿಷಯದೊಂದಿಗೆ ಹಲವಾರು ಅಸಂಗತತೆಗಳನ್ನು ಗಮನಿಸಿದ್ದೇವೆ. ವೀಡಿಯೊದಲ್ಲಿ ಮುಂದಿನ ಸಾಲಿನಲ್ಲಿ ನೀಲಿ ಟಿ-ಶರ್ಟ್ ಧರಿಸಿದ್ದ ವ್ಯಕ್ತಿಯ ಕೈಯಲ್ಲಿ ಆರಂಭದಲ್ಲಿ ಇಸ್ರೇಲಿ ಧ್ವಜವಿರಲಿಲ್ಲ. ಎರಡನೇ ಸೆಕೆಂಡಿನಲ್ಲಿ, ಇಸ್ರೇಲಿ ಧ್ವಜ ಇದ್ದಕ್ಕಿದ್ದಂತೆ ಅವನ ಕೈಯಲ್ಲಿ ಕಾಣಿಸಿಕೊಳ್ಳುತ್ತದೆ. ಇದು ಮೊದಲು ಇದನ್ನು AI ತಂತ್ರಜ್ಞಾನದಿಂದ ರಚಿಸಲಾಗಿದೆ ಎಂದು ತೋರಿಸುತ್ತದೆ. ಹಾಗೆಯೆ ಮಸುಕಾದ ವಿವರಗಳು, ಅಸ್ವಾಭಾವಿಕ ಮುಖದ ಮಿಶ್ರಣ, ಭಾಷಣದ ಸಮಯದಲ್ಲಿ ವಿಚಿತ್ರವಾದ ಬಾಯಿ ಚಲನೆಗಳು, ಪ್ರತಿಭಟನಾ ಫಲಕಗಳಲ್ಲಿ ತಪ್ಪಾಗಿ ಬರೆಯಲಾದ ಪಠ್ಯ ಸೇರಿವೆ.
ಇಷ್ಟೇ ಅಲ್ಲದೆ ವೀಡಿಯೊದ ಬಲಭಾಗದ ಕೆಳಗಿನ ಮೂಲೆಯಲ್ಲಿ "Veo" ಎಂಬ ಪದವೂ ಇದ್ದು, ಇದು ಗೂಗಲ್ನ AI ವೀಡಿಯೊ ಜನರೇಟರ್ ಆದ Veo ಬಳಸಿ ರಚಿಸಲ್ಪಟ್ಟಿದೆ ಎಂದು ಸೂಚಿಸುತ್ತದೆ.
ಇದಲ್ಲದೆ, ಇಸ್ರೇಲ್ ನಾಗರಿಕರು ಪ್ರತಿಭಟನೆ ನಡೆಸಿ ಇರಾನ್‌ಗೆ ಯುದ್ಧವನ್ನು ನಿಲ್ಲಿಸುವಂತೆ ಮನವಿ ಮಾಡಿದ ಬಗ್ಗೆ ಯಾವುದೇ ವಿಶ್ವಾಸಾರ್ಹ ವರದಿಗಳು ನಮಗೆ ಕಂಡುಬಂದಿಲ್ಲ.
ದೃಢೀಕರಿಸಲು ನಾವು ಡೀಪ್ ಫೇಕ್-ಒ-ಮೀಟರ್ ವೆಬ್‌ಸೈಟ್‌ಗೆ ವೀಡಿಯೊವನ್ನು ಅಪ್‌ಲೋಡ್ ಮಾಡಿದ್ದು, ಇದರಲ್ಲಿ 10 ರಲ್ಲಿ 6 ಡಿಟೆಕ್ಟರ್‌ಗಳು 74% ರಿಂದ 100% ವೈರಲ್ ವೀಡಿಯೊಗಳನ್ನು AI ತಂತ್ರಜ್ಞಾನದಿಂದ ರಚಿಸಲಾಗಿದೆ ಎಂದು ತೀರ್ಮಾನಿಸಿದೆ ಎಂದು ಕಂಡುಹಿಡಿದಿದೆ.
ಹಾಗೆಯೆ ನಾವು ಹೈವ್ AI ಪತ್ತೆ ಸಾಧನವನ್ನು ಬಳಸಿಕೊಂಡು ವೀಡಿಯೊವನ್ನು ವಿಶ್ಲೇಷಿಸಿದ್ದೇವೆ, ಇದು ಶೇ. 99.8 ರಷ್ಟಯ ಒಟ್ಟು ಸ್ಕೋರ್‌ನೊಂದಿಗೆ ಅದನ್ನು ಫ್ಲ್ಯಾಗ್ ಮಾಡಿದೆ. ಇದು AI ಬಳಸಿ ರಚಿಸಲಾದ ಹೆಚ್ಚಿನ ಸಂಭವನೀಯತೆಯನ್ನು ಸೂಚಿಸುತ್ತದೆ.
ಹೀಗಾಗಿ ಈ ಎಲ್ಲ ಮಾಹಿತಿಯ ಆಧಾರದ ಮೇಲೆ, ಇರಾನ್ ಜೊತೆಗಿನ ಯುದ್ಧವನ್ನು ಕೊನೆಗೊಳಿಸುವಂತೆ ಇಸ್ರೇಲಿಗಳು ಬೀದಿಗಿಳಿದು ಪ್ರತಿಭಟಿಸುವ ಮತ್ತು ಬೇಡಿಕೊಳ್ಳುವ ವೈರಲ್ ವೀಡಿಯೊವನ್ನು AI ತಂತ್ರಜ್ಞಾನದಿಂದ ರಚಿಸಲಾಗಿದೆ ಎಂದು ತಿಳಿದುಬಂದಿದೆ.
