Fact Check: ಬೊಮ್ಮನಹಳ್ಳಿ ಕ್ರಾಸ್​ನಲ್ಲಿ ಮೆಟ್ರೋ ಟ್ರೈನ್ ಕುಸಿತ ಎಂದು ಎಐ ರಚಿತ ವೀಡಿಯೊ ವೈರಲ್

ಸಾಮಾಜಿಕ ಜಾಲತಾಣಗಳಲ್ಲಿ ವೀಡಿಯೊ ಒಂದು ವೈರಲ್ ಆಗುತ್ತಿದೆ. ಇದರಲ್ಲಿ ಮೆಟ್ರೋ ಬ್ರಿಡ್ಜ್ ಟ್ರೈನ್ ಜೊತೆಯಲ್ಲಿ ಕುಸಿದು ಬಿದ್ದಿರುವುದನ್ನು ಕಾಣಬಹುದು. ಈ ಘಟನೆ ನಡೆದಿರುವ ಅಕ್ಕಪಕ್ಕ ಅನೇಕ ಜನರು ಸೇರಿಕೊಂಡಿದ್ದಾರೆ. ಬೆಂಗಳೂರಿನ ಬೊಮ್ಮನಹಳ್ಳಿ ಕ್ರಾಸ್ ಬಳಿ ಈ ದುರ್ಘಟನೆ ನಡೆದಿದೆ ಎಂದು ಅನೇಕ ಬಳಕೆದಾರರು ಈ ವೀಡಿಯೊವನ್ನು ಹಂಚಿಕೊಳ್ಳುತ್ತಿದ್ದಾರೆ.

ಇನ್​ಸ್ಟಾಗ್ರಾಮ್ ಬಳಕೆದಾರರೊಬ್ಬರು ಮಾರ್ಚ್ 5, 2025 ರಂದು ಈ ವೀಡಿಯೊವನ್ನು ಹಂಚಿಕೊಂಡು, ‘‘ಬೆಂಗಳೂರು ಬೊಮ್ಮನಹಳ್ಳಿ ಕ್ರಾಸ್ಅಲ್ಲಿ ಮೆಟ್ರೋ ಟ್ರೈನ್ ಕುಸಿತಗೊಂಡಿರುವ ದೃಶ್ಯ’’ ಎಂದು ಬರೆದುಕೊಂಡಿದ್ದಾರೆ. ವೀಡಿಯೋ ಮೇಲೆ ಕೂಡ ಬೆಂಗಳೂರು ಬೊಮ್ಮನಹಳ್ಳಿ ಕ್ರಾಸ್ ಎಂದು ಬರೆಯಲಾಗಿದೆ.

ಇದೇರೀತಿಯ ಹೇಳಿಕೆಯೊಂದಿಗೆ ವೈರಲ್ ಆಗುತ್ತಿರುವ ವೀಡಿಯೊವನ್ನು ನೀವು ಇಲ್ಲಿ, ಇಲ್ಲಿ ನೋಡಬಹುದು.

Fact Check:

ಈ ಸುದ್ದಿಯ ಸತ್ಯಾಸತ್ಯತೆಯನ್ನು ನ್ಯೂಸ್ ಮೀಟರ್ ಪರಿಶೋದಿಸಿದಾಗ ಸುಳ್ಳು ಹೇಳಿಕೆಯೊಂದಿಗೆ ಈ ವೀಡಿಯೊ ವೈರಲ್ ಆಗುತ್ತಿದೆ ಎಂಬುದು ಕಂಡುಬಂದಿದೆ. ಬೆಂಗಳೂರಿನಲ್ಲಿ ಮೆಟ್ರೋ ಟ್ರೈನ್ ಅಪಘಾತದ ಘಟನೆ ನಡೆದೇ ಇಲ್ಲ. ಇದು ಕೃತಕ ಬುದ್ದಿಮತ್ತೆ (AI) ಯಿಂದ ರಚಿಸಲಾದ ವೀಡಿಯೊ ಆಗಿದೆ.

ನಾವು ನಿಜಾಂಶವನ್ನು ತಿಳಿಯಲು ಈ ವೀಡಿಯೊವನ್ನು ಗೂಗಲ್ ಲೆನ್ಸ್ ಸಹಾಯದಿಂದ ಸರ್ಚ್ ಮಾಡಿದ್ದೇವೆ. ಆಗ ಕಳೆದ ಒಂದು ವಾರದಲ್ಲಿ ಯೂಟ್ಯೂಬ್, ಇನ್​ಸ್ಟಾಗ್ರಾಮ್​ನಲ್ಲಿ ಕೆಲ ಬಳಕೆದಾರರು ಇದೇ ವೀಡಿಯೊವನ್ನು ಅಪ್ಲೋಡ್ ಆಡಿರುವುದು ಕಂಡುಬಂತು. ಆದರೆ, ಇದಕ್ಕೆ ಯಾವುದೇ ಕ್ಯಾಪ್ಶನ್ ಇರಲಿಲ್ಲ.

ಬಳಿಕ ನಾವು ವೀಡಿಯೊವನ್ನು ಸೂಕ್ಷ್ಮವಾಗಿ ಗಮನಿಸಿದ್ದೇವೆ. ಇದು ನೈಜ್ಯತೆಗೆ ದೂರವಾದಂತಿದೆ. ಇದರಲ್ಲಿ ಕೆಲವು ವ್ಯಕ್ತಿಗಳು ಕುಂಟುತ್ತ ವೇಗವಾಗಿ ಓಡಾಡುತ್ತಿರುವುದನ್ನು ಕಾಣಬಹುದು. ಹಾಗೆಯೆ ನಂತರದ ಫ್ರೇಮ್‌ನಲ್ಲಿ ಆ ವ್ಯಕ್ತಿಗಳು ನಾಪತ್ತೆಯಾಗುತ್ತಾರೆ. ಕೆಲವರದ್ದು ಅರ್ಧ ದೇಹ ಮಾತ್ರ ಇದೆ. ಹೀಗಾಗಿ ನಮಗೆ ಇದು ಕೃತಕ ಬುದ್ಧಿಮತ್ತೆ ಬಳಸಿ ತಯಾರಿಸಿದ ವಿಡಿಯೋ ಆಗಿರಬಹುದು ಎಂಬ ಅನುಮಾನ ಕಾಡಿತು.

ಹೀಗಾಗಿ ಕೃತಕ ಬುದ್ಧಿಮತ್ತೆ ಬಳಸಿ ತಯಾರಿಸಿದ ವಿಷಯ-ವಸ್ತುಗಳನ್ನು ಪತ್ತೆ ಹಚ್ಚುವ ಹೈವ್‌ ಮಾಡರೇಷನ್‌ ಟೂಲ್‌ ಮೂಲಕ ಈ ವೀಡಿಯೊವನ್ನು ಪರಿಶೀಲಿಸಿದ್ದೇವೆ. ಆಗ ಇದು ಶೇ. 97.3 ರಷ್ಟು ಎಐ ಕಂಟೆಂಟ್‌ ಅನ್ನು ಒಳಗೊಂಡಿದೆ ಎಂದು ಫಲಿತಾಂಶ ನೀಡಿದೆ.

ಇನ್ನಷ್ಟು ಖಚಿತತೆಗಾಗಿ ಮತ್ತೊಂದು ಎಐ ಪತ್ತೆ ಸಾಧನ ಸೈಟ್ ಇಂಜಿನ್ ಸಹಾಯದಿಂದ ಪರಿಶೀಲಿಸಿದ್ದೇವೆ. ಆಗ ಇದು ಶೇ. 75 ರಷ್ಟು ಎಐ ಕಂಟೆಂಟ್‌ ಅನ್ನು ಒಳಗೊಂಡಿದೆ ಎಂದು ಫಲಿತಾಂಶ ನೀಡಿದೆ.

ಬಳಿಕ ಬೆಂಗಳೂರಿನ ಬೊಮ್ಮನಹಳ್ಳಿಯಲ್ಲಿ ಮೆಟ್ರೋ ಅಪಘಾತ ಸಂಭವಿಸಿದೆಯೇ? ಎಂದು ನಾವು ಗೂಗಲ್​ನಲ್ಲಿ ಹುಡುಕಿದ್ದೇವೆ. ಆಗ ET Now News ಫೆಬ್ರವರಿ 25, 2025 ರಂದು ‘‘ನಮ್ಮ ಮೆಟ್ರೋ ಹಳದಿ ಮಾರ್ಗದ ಬಗ್ಗೆ CMRS ಪರಿಶೀಲನೆ’’ ಎಂಬ ಹೆಡ್​ಲೈನ್​ನೊಂದಿಗೆ ಸುದ್ದಿ ಪ್ರಕಟಿಸಿರುವುದು ಸಿಕ್ಕಿದೆ. ಇದರಲ್ಲಿರುವ ಮಾಹಿತಿಯ ಪ್ರಕಾರ, ಬೊಮ್ಮನಹಳ್ಳಿ ನಮ್ಮ ಮೆಟ್ರೋದ ಹಳದಿ ಮಾರ್ಗದಲ್ಲಿ ಬರುತ್ತದೆ. ಆದರೆ, ಅಲ್ಲಿಗೆ ಇನ್ನೂ ಮೆಟ್ರೋ ಸಂಚಾರ ಆರಂಭವಾಗಿಲ್ಲ. ಹಾಗೆಯೆ ನಾವು ಬೆಂಗಳೂರಿನ ಟಿವಿ9 ಕನ್ನಡ ವರದಿಗಾರ ಕಿರಣ್ ಸೂರ್ಯ ಅವರನ್ನು ಸಂಪರ್ಕಿಸಿದ್ದೇವೆ. ಅವರು ಈ ರೀತಿಯ ಯಾವುದೇ ಘಟನೆ ನಡೆದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಹೀಗಾಗಿ ಈ ಎಲ್ಲ ಮಾಹಿತಿಯ ಆಧಾರದ ಮೇಲೆ ಬೆಂಗಳೂರಿನ ಬೊಮ್ಮನಹಳ್ಳಿ ಕ್ರಾಸ್ನಲ್ಲಿ ಮೆಟ್ರೋ ಟ್ರೈನ್ ಕುಸಿತ ಎಂದು ವೈರಲ್ ಆಗುತ್ತಿರುವ ವೀಡಿಯೊ ಎಐ ಯಿಂದ ರಚಿತವಾಗಿದ್ದು ಎಂದು ನಾವು ಖಚಿತವಾಗಿ ಹೇಳುತ್ತೇವೆ.