Fact Check: 'ಪ್ರಧಾನಿ ವಿಶ್ವಕರ್ಮ' ಯೋಜನೆಯ ಮೋದಿ ಅವರ ಹಳೆಯ ಫೋಟೋ ಸುಳ್ಳು ಹೇಳಿಕೆಯೊಂದಿಗೆ ವೈರಲ್

ಪ್ರಧಾನಿ ನರೇಂದ್ರ ಮೋದಿ ಅವರು ಮನೆಯೊಳಗೆ ಮಹಿಳೆಯೊಂದಿಗೆ ಸಂವಹನ ನಡೆಸುತ್ತಿರುವ ಫೋಟೋವನ್ನು ಸಾಮಾಜಿಕ ಮಾಧ್ಯಮದಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾಗುತ್ತಿದೆ. ಆ ಮಹಿಳೆ ಹೊಲಿಗೆ ಯಂತ್ರದಲ್ಲಿ ಕೆಲಸ ಮಾಡುತ್ತಿರುವಂತೆ ಕಂಡುಬರುತ್ತಿದೆ ಮತ್ತು ಅವರ ಕುತ್ತಿಗೆಯಲ್ಲಿ ಗುರುತಿನ ಚೀಟಿಯೂ ನೇತಾಡುತ್ತಿದೆ. ಪ್ರಧಾನಿ ಮೋದಿ ನಕಲಿ ಗುಡಿಸಲಿನಲ್ಲಿ ಬಡ ಮಹಿಳೆಯನ್ನು ಭೇಟಿಯಾಗುವಂತೆ ನಟಿಸುತ್ತಿದ್ದಾರೆ ಎಂಬ ಹೇಳಿಕೆಯೊಂದಿಗೆ ಪೋಸ್ಟ್ ವೈರಲ್ ಆಗುತ್ತಿದೆ.

ಫೇಸ್​ಬುಕ್ ಬಳಕೆದಾರರೊಬ್ಬರು ಈ ಫೋಟೋವನ್ನು ಹಂಚಿಕೊಂಡು, ‘‘ಓರ್ವ ಬಡ ಮಹಿಳೆಯ ಗುಡಿಸಲಿನಲ್ಲಿ ಪ್ಲಾಸ್ಟಿಕ್ ಪೈಂಟ್ ಹಚ್ಚಿರುವ ಗೋಡೆಗಳು, ಹೊಚ್ಚಹೊಸ ಹೊಲಿಗೆ ಯಂತ್ರ, ಹೊಲಿಗೆ ಯಂತ್ರದ ಕೆಂಪು ರಿಬ್ಬನ್ ಇನ್ನೂ ಕೂಡಾ ಕಾಣುತ್ತಾ ಇದೆ. ಬೆಲೆಬಾಳುವ ಕಾರ್ಪೆಟ್, ಹೊಸ ತಲೆದಿಂಬು ಕವರ್ ಗಳು, ಆ ಬಡ ಮಹಿಳೆ ಮನೆಯಲ್ಲಿ ಕೂಡಾ ಐಡಿ ಕಾರ್ಡ್ ಧರಿಸಿ ಕೂತಿದ್ದಾಳೆ. ಅಷ್ಟೊಂದು ನೀಟಾಗಿರುವ ಮನೆಯಲ್ಲಿ ನೆಲದಲ್ಲಿ ಚದುರಿ ಬಿದ್ದಿರುವ ಒಂದೇ ಬಣ್ಣದ ಏಳೆಂಟು ಬಟ್ಟೆಯ ತುಂಡುಗಳು. ಓರ್ವ ಬಡ ಮಹಿಳೆಯ ಗುಡಿಸಲು ಮನೆಯಲ್ಲಿ ಸಾವಿರಾರು ರೂಪಾಯಿ ಬೆಲೆಯ ಕಣ್ಣು ಕುಕ್ಕುವ ಹೈಮಾಸ್ಕ್ ಎಲ್ ಈ ಡಿ ಲೈಟ್. ಇದು ಫೋಟೋ ಶೂಟ್ ಗಾಗಿ ಸೃಷ್ಟಿಸಿದ ಸ್ಟುಡಿಯೋ ಅಲ್ಲ ಎಂದು ಇನ್ನೂ ನಿಮಗೆ ಅನಿಸುವುದಾದರೆ ನಿಮ್ಮನ್ನು "ಅಂಧ ಭಕ್ತ" ಎಂದು ಘೋಷಿಸಲಾಗುವುದು’’ ಎಂದು ಬರೆದುಕೊಂಡಿದ್ದಾರೆ. (Archive)

Fact Check:

ಈ ಸುದ್ದಿಯ ಸತ್ಯಾಸತ್ಯತೆಯನ್ನು ನ್ಯೂಸ್ ಮೀಟರ್ ಪರಿಶೋದಿಸಿದಾಗ ಸುಳ್ಳು ಹೇಳಿಕೆಯೊಂದಿಗೆ ಈ ಫೋಟೋ ವೈರಲ್ ಆಗುತ್ತಿದೆ ಎಂಬುದು ಕಂಡುಬಂದಿದೆ. ಇದು ಸೆಪ್ಟೆಂಬರ್ 17, 2023 ರಂದು ನವದೆಹಲಿಯ ದ್ವಾರಕಾದ ಯಶೋಭೂಮಿಯಲ್ಲಿ ನಡೆದ ಪ್ರದರ್ಶನದಿಂದ ಬಂದಿದ್ದಾಗಿದೆ.

ನಿಜಾಂಶವನ್ನು ತಿಳಿಯಲು ನಾವು ವೈರಲ್ ಫೋಟೋವನ್ನು ಗೂಗಲ್ ಲೆನ್ಸ್ ಸಹಾಯದಿಂದ ಹುಡುಕಿದ್ದೇವೆ. ಈ ಸಂದರ್ಭ ಸೆಪ್ಟೆಂಬರ್ 17, 2023 ರಂದು ನ್ಯೂಸ್ 18 ಪ್ರಕಟಿಸಿದ ವರದಿ ಕಂಡುಬಂತು. ಇದರಲ್ಲಿ ವೈರಲ್ ಪೋಸ್ಟ್‌ನಲ್ಲಿ ಅದೇ ಫೋಟೋ ಇದೆ. ವರದಿಯ ಪ್ರಕಾರ, ಈ ಚಿತ್ರವನ್ನು ಪ್ರಧಾನಮಂತ್ರಿಯವರ 73 ನೇ ಹುಟ್ಟುಹಬ್ಬದಂದು, ವಿಶ್ವಕರ್ಮ ಜಯಂತಿಯ ಸಂದರ್ಭದಲ್ಲಿ ದ್ವಾರಕಾದ ಯಶೋಭೂಮಿಯಲ್ಲಿ ಮೂರು ದಿನಗಳ ಪ್ರದರ್ಶನಕ್ಕೆ ಭೇಟಿ ನೀಡಿದಾಗ ತೆಗೆದುಕೊಳ್ಳಲಾಗಿದೆ.

"ಪ್ರಧಾನಿ ನರೇಂದ್ರ ಮೋದಿ ಅವರು ದ್ವಾರಕಾದ ಇಂಡಿಯಾ ಇಂಟರ್ನ್ಯಾಷನಲ್ ಕನ್ವೆನ್ಷನ್ ಮತ್ತು ಎಕ್ಸ್‌ಪೋ ಸೆಂಟರ್‌ನಲ್ಲಿ ವಿಶ್ವಕರ್ಮ ಪಾಲುದಾರರೊಂದಿಗೆ "ಪಿಎಂ ವಿಶ್ವಕರ್ಮ" ಯೋಜನೆಯನ್ನು ಪ್ರಾರಂಭಿಸಲು ಸಂವಾದ ನಡೆಸಿದರು. ಅವರು ಹಲವಾರು ಕುಶಲಕರ್ಮಿಗಳೊಂದಿಗೆ ಸಮಯ ಕಳೆದರು ಮತ್ತು ಮಹಿಳಾ ಕುಶಲಕರ್ಮಿಗಳಿಂದ ಅವರ ಕೌಶಲ್ಯಗಳ ಬಗ್ಗೆ ಕಲಿತರು" ಎಂದು ಚಿತ್ರದ ಜೊತೆಗೆ ಶೀರ್ಷಿಕೆಯನ್ನು ನೀಡಲಾಗಿದೆ.

ಈ ಫೋಟೋವನ್ನು ನಾವು PM India ವೆಬ್‌ಸೈಟ್‌ನಲ್ಲಿಯೂ ಕಂಡುಕೊಂಡಿದ್ದೇವೆ. ಫೋಟೋ ಜೊತೆಗಿನ ಶೀರ್ಷಿಕೆ ಹೀಗಿದೆ, ವಿಶ್ವಕರ್ಮ ಜಯಂತಿಯ ಸಂದರ್ಭದಲ್ಲಿ ಸೆಪ್ಟೆಂಬರ್ 17, 2023 ರಂದು ನವದೆಹಲಿಯ ದ್ವಾರಕಾದಲ್ಲಿರುವ ಇಂಡಿಯಾ ಇಂಟರ್ನ್ಯಾಷನಲ್ ಕನ್ವೆನ್ಷನ್ ಮತ್ತು ಎಕ್ಸ್‌ಪೋ ಸೆಂಟರ್ (ಯಶೋಭೂಮಿ) ನಲ್ಲಿ PM ವಿಶ್ವಕರ್ಮ ಯೋಜನೆಯ ಉದ್ಘಾಟನೆಗೆ ಮುಂಚಿತವಾಗಿ ಪ್ರಧಾನ ಮಂತ್ರಿಯವರು ಪ್ರದರ್ಶನಕ್ಕೆ ಭೇಟಿ ನೀಡಿದರು.

ಹೆಚ್ಚುವರಿಯಾಗಿ, ಸೆಪ್ಟೆಂಬರ್ 17, 2023 ರಂದು ಪ್ರಧಾನಿ ಮೋದಿಯವರ ಯೂಟ್ಯೂಬ್ಖಾತೆಯಿಂದ ನೇರಪ್ರಸಾರವಾದ ವೀಡಿಯೊದಲ್ಲಿ ಈ ಚಿತ್ರಕ್ಕೆ ಸಂಬಂಧಿಸಿದ ದೃಶ್ಯಗಳನ್ನು ನಾವು ಕಂಡುಕೊಂಡಿದ್ದೇವೆ. ವೀಡಿಯೊದ ಶೀರ್ಷಿಕೆ ಮತ್ತು ವಿವರಣೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ವಿಶ್ವಕರ್ಮ ಜಯಂತಿಯ ಸಂದರ್ಭದಲ್ಲಿ ಭಗವಾನ್ ವಿಶ್ವಕರ್ಮನಿಗೆ ಪುಷ್ಪ ನಮನ ಸಲ್ಲಿಸಿದರು ಎಂದು ಹೇಳಲಾಗಿದೆ. ಅವರು ಪ್ರಧಾನ ಮಂತ್ರಿ ವಿಶ್ವಕರ್ಮ ಯೋಜನೆಯನ್ನು ಸಹ ಪ್ರಾರಂಭಿಸಿದರು ಮತ್ತು ಪ್ರದರ್ಶನಕ್ಕೆ ಭೇಟಿ ನೀಡಿದರು, ದೇಶಾದ್ಯಂತದ ಕುಶಲಕರ್ಮಿಗಳನ್ನು ಭೇಟಿ ಮಾಡಿದರು ಎಂದಿದೆ. ವೈರಲ್ ಫೋಟೋದಲ್ಲಿರುವ ದೃಶ್ಯವನ್ನು ನೀವು 16 ನಿಮಿಷ 50 ಸೆಕೆಂಡ್​ಗಳಲ್ಲಿ ಕಾಣಬಹುದು.

ವಿಶ್ವಕರ್ಮ ಜಯಂತಿಯ ಸಂದರ್ಭದಲ್ಲಿ, ಸೆಪ್ಟೆಂಬರ್ 17, 2023 ರಂದು ಪಿಐಬಿವೆಬ್‌ಸೈಟ್‌ನಲ್ಲಿ ಪ್ರಕಟವಾದ ವರದಿಯ ಪ್ರಕಾರ, ಪ್ರಧಾನಿ ಮೋದಿ ಅವರು ಸಾಂಪ್ರದಾಯಿಕ ಕುಶಲಕರ್ಮಿಗಳು ಮತ್ತು ಕುಶಲಕರ್ಮಿಗಳಿಗಾಗಿ "ಪಿಎಂ ವಿಶ್ವಕರ್ಮ" ಯೋಜನೆಯನ್ನು ಪ್ರಾರಂಭಿಸಿದರು ಮತ್ತು ಯಶೋಭೂಮಿ ಭಾರತ ಅಂತರರಾಷ್ಟ್ರೀಯ ಸಮಾವೇಶ ಮತ್ತು ಪ್ರದರ್ಶನ ಕೇಂದ್ರದ ಮೊದಲ ಹಂತವನ್ನು ಉದ್ಘಾಟಿಸಿದರು. ಸ್ಥಳಕ್ಕೆ ಆಗಮಿಸಿದ ನಂತರ, ಅವರು "ಗುರು-ಶಿಷ್ಯ ಸಂಪ್ರದಾಯ" ಮತ್ತು "ಹೊಸ ತಂತ್ರಜ್ಞಾನ" ಪ್ರದರ್ಶನಗಳಿಗೆ ಭೇಟಿ ನೀಡಿದರು.

ಹೀಗಾಗಿ ಈ ಎಲ್ಲ ಮಾಹಿತಿಯ ಆಧಾರದ ಮೇಲೆ, ಪ್ರಧಾನಿ ಮೋದಿ ಅವರು ಗುಡಿಸಲಿನಲ್ಲಿ ಬಡ ಮಹಿಳೆಯನ್ನು ಭೇಟಿಯಾಗುವಂತೆ ನಟಿಸುತ್ತಿದ್ದಾರೆಂದು ಹೇಳುವ ವೈರಲ್ ಚಿತ್ರವು ಎರಡು ವರ್ಷ ಹಳೆಯದು ಮತ್ತು ಇದು ಒಂದು ಪ್ರದರ್ಶನದಿಂದ ಬಂದಿದೆ ಎಂದು ನಾವು ಖಚಿತವಾಗಿ ಹೇಳುತ್ತೇವೆ.