Fact Check: ಧುರಂಧರ್ 2 ನಂತರ ಪಾಕಿಸ್ತಾನದಲ್ಲಿ ಪೊಲೀಸರು ಭಾರತೀಯ ಸ್ಪೈಗಾಗಿ ಬೀದಿ ಬೀದಿಯಲ್ಲಿ ಹುಡುಕುತ್ತಿದ್ದಾರಾ? ಸುಳ್ಳು, ಸತ್ಯ ಇಲ್ಲಿದೆ
"ಧುರಂಧರ್ 2: ದಿ ರಿವೆಂಜ್" ಚಿತ್ರ ಬಿಡುಗಡೆಯಾದ ನಂತರ, ಜನರನ್ನು ಶೋಧಿಸಿ ವಿಚಾರಣೆ ನಡೆಸುತ್ತಿರುವ ವೀಡಿಯೊ ಒಂದು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿವೆ. ಭಾರತೀಯ ಗೂಢಚಾರರಿಗಾಗಿ ಪಾಕಿಸ್ತಾನದಲ್ಲಿ ಹುಡುಕಾಟ ತೀವ್ರಗೊಂಡಿದೆ ಎಂಬ ಹೇಳಿಕೆಯೊಂದಿಗೆ ಈ ವೀಡಿಯೊಗಳನ್ನು ಹಂಚಿಕೊಳ್ಳಲಾಗುತ್ತಿದೆ.
By - Vinay Bhat
Claim:ಧುರಂಧರ್ 2 ಸಿನಿಮಾ ಬಿಡುಗಡೆಯಾದ ನಂತರ ಪಾಕಿಸ್ತಾನದಲ್ಲಿ ಪೊಲೀಸರು ಭಾರತೀಯ ಸ್ಪೈಗಾಗಿ ಹುಡುಕಾಟ ನಡೆಸುತ್ತಿರುವುದನ್ನು ವೀಡಿಯೊ ತೋರಿಸುತ್ತದೆ.
Fact:ಧುರಂಧರ್ 2 ಚಿತ್ರ ಬಿಡುಗಡೆಯಾಗುವ ಮೊದಲಿನಿಂದಲೂ ಆನ್ಲೈನ್ನಲ್ಲಿ ಈ ವೀಡಿಯೊ ಹರಿದಾಡುತ್ತಿದೆ. ಇದು ವಾಸ್ತವವಾಗಿ ಪಾಕಿಸ್ತಾನ ಪೊಲೀಸರ ಮಾದಕವಸ್ತು ವಿರೋಧಿ ಅಭಿಯಾನಕ್ಕೆ ಸಂಬಂಧಿಸಿದೆ.
"ಧುರಂಧರ್ 2: ದಿ ರಿವೆಂಜ್" ಚಿತ್ರ ಬಿಡುಗಡೆಯಾದ ನಂತರ, ಜನರನ್ನು ಶೋಧಿಸಿ ವಿಚಾರಣೆ ನಡೆಸುತ್ತಿರುವ ವೀಡಿಯೊ ಒಂದು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿವೆ. ಭಾರತೀಯ ಗೂಢಚಾರರಿಗಾಗಿ ಪಾಕಿಸ್ತಾನದಲ್ಲಿ ಹುಡುಕಾಟ ತೀವ್ರಗೊಂಡಿದೆ ಎಂಬ ಹೇಳಿಕೆಯೊಂದಿಗೆ ಈ ವೀಡಿಯೊಗಳನ್ನು ಹಂಚಿಕೊಳ್ಳಲಾಗುತ್ತಿದೆ. ಮಾರ್ಚ್ 19, 2026 ರಂದು ಈದ್ ಹಬ್ಬದಂದು ಬಿಡುಗಡೆಯಾದ ಈ ಚಿತ್ರದಲ್ಲಿ, ನಟ ರಣವೀರ್ ಸಿಂಗ್ ಪಾಕಿಸ್ತಾನದಲ್ಲಿ ವಾಸಿಸುವ ಮತ್ತು ಬೇಹುಗಾರಿಕೆ ನಡೆಸುವ ಗೂಢಚಾರ ಹಮ್ಜಾ ಪಾತ್ರವನ್ನು ನಿರ್ವಹಿಸಿದ್ದಾರೆ.
ವೈರಲ್ ಆಗಿರುವ ವಿಡಿಯೋದಲ್ಲಿ, ಕೆಲವು ಪೊಲೀಸರು ರಸ್ತೆಬದಿಯಲ್ಲಿ ಮಲಗಿದ್ದ ವೃದ್ಧನನ್ನು ಎಬ್ಬಿಸಿ ತಪಾಸಣೆ ಮಾಡುತ್ತಿರುವುದನ್ನು ಕಾಣಬಹುದು. ಫೇಸ್ಬುಕ್ ಬಳಕೆದಾರರೊಬ್ಬರು ಈವೀಡಿಯೊ ಹಂಚಿಕೊಂಡು, ‘‘ಧುರಂಧರ್ 2 ರ ನಂತರ, ಪಾಕಿಸ್ತಾನದಲ್ಲಿ ಭಯದ ವಾತಾವರಣ ಶುರುವಾಗಿದೆ. ಈಗ ಪೊಲೀಸರು ಮತ್ತು ಸ್ಥಳೀಯರು ಕೂಡಿ ಭಾರತೀಯ ಗೂಢಚಾರರಿಗಾಳಿಗಾಗಿ ಪಾಕಿಸ್ತಾನದ ಪ್ರತಿಯೊಂದು ಬೀದಿ ಬೀದಿಯಲ್ಲಿ ನಾಯಿತರ ಹುಡುಕುತ್ತಿದ್ದಾರೆ.’’ ಎಂದು ಬರೆದುಕೊಂಡಿದ್ದಾರೆ. (Archive)
Fact Check
ಈ ಸುದ್ದಿಯ ಸತ್ಯಾಸತ್ಯತೆಯನ್ನು ನ್ಯೂಸ್ ಮೀಟರ್ ಪರಿಶೋದಿಸಿದಾಗ ಸುಳ್ಳು ಹೇಳಿಕೆಯೊಂದಿಗೆ ಈ ವೀಡಿಯೊ ವೈರಲ್ ಆಗುತ್ತಿದೆ ಎಂಬುದು ಕಂಡುಬಂದಿದೆ. "ಧುರಂಧರ್ 2" ಚಿತ್ರ ಬಿಡುಗಡೆಯಾಗುವ ಮೊದಲಿನಿಂದಲೂ ಈ ವೀಡಿಯೊ ಅಂತರ್ಜಾಲದಲ್ಲಿ ಹರಿದಾಡುತ್ತಿದೆ. ಇದು ವಾಸ್ತವವಾಗಿ ಪಾಕಿಸ್ತಾನ ಪೊಲೀಸರ ಮಾದಕವಸ್ತು ವಿರೋಧಿ ಅಭಿಯಾನಕ್ಕೆ ಸಂಬಂಧಿಸಿದ್ದಾಗಿದೆ.
ನಿಜಾಂಶವನ್ನು ತಿಳಿಯಲು ನಾವು ವಿಪಿಎನ್ ಬಳಸಿ ವೈರಲ್ ವೀಡಿಯೊದ ಪ್ರಮುಖ ಕೀ ಫ್ರೇಮ್ಗಳನ್ನು ಗೂಗಲ್ ಲೆನ್ಸ್ ಸಹಾಯದಿಂದ ಹುಡುಕಾಟ ನಡೆಸಿದ್ದೇವೆ. ಆಗ ಪಾಕಿಸ್ತಾನಿ ಕಂಟೆಂಟ್ ಕ್ರಿಯೇಟರ್ಒಬ್ಬರು ಇದೇ ವೀಡಿಯೊವನ್ನು ಡಿಸೆಂಬರ್ 26, 2025 ರಂದು ಇನ್ಸ್ಟಾಗ್ರಾಮ್ನಲ್ಲಿ ಅಪ್ಲೋಡ್ ಮಾಡಿರುವುದು ಸಿಕ್ಕಿತು. ಇದು ಸಿನಿಮಾ ಬಿಡುಗಡೆಗೆ ಬಹಳ ಹಿಂದೆಯೇ ವೀಡಿಯೊ ಆನ್ಲೈನ್ನಲ್ಲಿ ಅಸ್ತಿತ್ವದಲ್ಲಿತ್ತು ಎಂದು ದೃಢಪಡಿಸುತ್ತದೆ.
ಈ ಖಾತೆಯನ್ನು ಪರಿಶೀಲಿಸಿದಾಗ, ವೈರಲ್ ವೀಡಿಯೊದಂತೆಯೇ ಅದೇ ಸಮಯದಲ್ಲಿ ಅಪ್ಲೋಡ್ ಮಾಡಲಾದ ಹಲವಾರು ವೀಡಿಯೊಗಳು ನಮಗೆ ಕಂಡುಬಂದಿವೆ. ಅವುಗಳ ವಿವರಣೆಗಳಲ್ಲಿ ಇವುಗಳನ್ನು ಪಾಕಿಸ್ತಾನದ ಹೈದರಾಬಾದ್ ಮತ್ತು ಕರಾಚಿಯಲ್ಲಿ ಚಿತ್ರೀಕರಿಸಲಾಗಿದೆ ಎಂದು ಸೂಚಿಸುತ್ತವೆ. ವೈರಲ್ ವೀಡಿಯೊದಲ್ಲಿ ಕಂಡುಬರುವ ಅದೇ ವ್ಯಕ್ತಿಗಳು ಈ ವೀಡಿಯೊದಲ್ಲಿ ಕಾಣಿಸುತ್ತಾರೆ.
ಇದಲ್ಲದೆ, ಈ ವೀಡಿಯೊಗಳ ಶೀರ್ಷಿಕೆಗಳಲ್ಲಿ "ಗ್ರ್ಯಾಂಡ್ ಆಪರೇಷನ್" ಎಂಬ ಪದ ಬಳಸಿರುವುದನ್ನು ನಾವು ಗಮನಿಸಿದ್ದೇವೆ. ಈ ಪದವನ್ನು ಹುಡುಕಿದಾಗ ನಮಗೆ ಹಲವಾರು ಸ್ಥಳೀಯ ಸುದ್ದಿವರದಿಗಳು ಸಿಕ್ಕವು. ಆಂಟಿ-ನಾರ್ಕೋಟಿಕ್ಸ್ ಅಂಡ್ ಕ್ರೈಮ್ ಕಂಟ್ರೋಲ್ ಎಂಬ NGO ಸ್ಥಳೀಯ ಪೊಲೀಸರ ಸಹಯೋಗದೊಂದಿಗೆ, ಮಾದಕ ವ್ಯಸನಿಗಳು ಮತ್ತು ಅಪರಾಧದಲ್ಲಿ ಭಾಗಿಯಾಗಿರುವ ವ್ಯಕ್ತಿಗಳನ್ನು ಗುರುತಿಸಲು ಕಾರ್ಯಾಚರಣೆಗಳನ್ನು ನಡೆಸಿ ಅವರನ್ನು ಪುನರ್ವಸತಿ ಕೇಂದ್ರಗಳಿಗೆ ಕಳುಹಿಸುವ ಆಪರೇಷನ್ ಇದಾಗಿದೆ ಎಂದು ಅದು ಹೇಳುತ್ತದೆ.
ವರದಿಯಲ್ಲಿ, ಈ ಸಂಸ್ಥೆಯ ಕಾರ್ಯಾಚರಣಾ ನಿರ್ದೇಶಕ ಯೂನಸ್ ಅಮೀನ್, ಕನಿಷ್ಠ 2023 ರಿಂದ ಇಂತಹ ಚಟುವಟಿಕೆಗಳನ್ನು ನಡೆಸುತ್ತಿದ್ದಾರೆ ಮತ್ತು ಸಂಬಂಧಿತ ವೀಡಿಯೊಗಳನ್ನು ಸಾಮಾಜಿಕಮಾಧ್ಯಮದಲ್ಲಿ ಹಂಚಿಕೊಳ್ಳುತ್ತಿದ್ದಾರೆ ಎಂದು ಬರೆಯಲಾಗಿದೆ. ಯೂನಸ್ ಅಮೀನ್ ಮತ್ತು ಅವರು ಪಾಕಿಸ್ತಾನದ ಮಾದಕ ದ್ರವ್ಯ ವಿರೋಧಿ ಮತ್ತು ಅಪರಾಧ ನಿಯಂತ್ರಣ (ANCC) ದ ಕಾರ್ಯಾಚರಣಾ ನಿರ್ದೇಶಕರು ಎಂದು ANCC ಯ ಅಧಿಕೃತ ವೆಬ್ಸೈಟ್ ಸಹ ದೃಢಪಡಿಸಿದೆ.
ಜುಲೈ 21, 2025 ರಂದು ಡೈಲಾಗ್ ಪಾಕಿಸ್ತಾನ್ ಎಂಬ ಯೂಟ್ಯೂಬ್ ಚಾನೆಲ್ನಲ್ಲಿ ಅಪ್ಲೋಡ್ ಮಾಡಲಾದ ವೀಡಿಯೊದಲ್ಲಿ ಅಮೀನ್ ಅವರ ಸಂದರ್ಶನವನ್ನು ನಾವು ಕಂಡುಕೊಂಡಿದ್ದೇವೆ. ಅದರಲ್ಲಿ, ಅವರು ಸಿಂಧ್ ಪೊಲೀಸರೊಂದಿಗೆ ಕರಾಚಿಯ ಬೀದಿಗಳಿಂದ ಮಾದಕ ವ್ಯಸನಿಗಳನ್ನು ತೆಗೆದುಹಾಕಲು "ಗ್ರ್ಯಾಂಡ್ ಆಪರೇಷನ್" ನಡೆಸುತ್ತಿದ್ದಾರೆ ಎಂದು ವಿವರಿಸುತ್ತಾರೆ. ವ್ಯಸನಿಗಳು ಹೆಚ್ಚಾಗಿ ಮೋಟಾರ್ ಸೈಕಲ್ ಕಳ್ಳತನ ಮತ್ತು ಬ್ಯಾಟರಿ ಕಸಿದುಕೊಳ್ಳುವಂತಹ ಅಪರಾಧಗಳನ್ನು ಮಾಡುತ್ತಾರೆ. ಈ ಅಭಿಯಾನದ ಭಾಗವಾಗಿ, ಮಾದಕ ವ್ಯಸನಿಗಳನ್ನು ಪುನರ್ವಸತಿ ಕೇಂದ್ರಗಳಿಗೆ ಕಳುಹಿಸಲಾಗುತ್ತದೆ, ಅಲ್ಲಿ ಅವರು ಚಿಕಿತ್ಸೆ ಮತ್ತು ವಿವಿಧ ಕೌಶಲ್ಯಗಳನ್ನು ಪಡೆಯುತ್ತಾರೆ.
ಹೆಚ್ಚುವರಿಯಾಗಿ, ದುರಂಧರ್ 2 ಬಿಡುಗಡೆಯಾದ ನಂತರ ಕರಾಚಿಯಲ್ಲಿ ಸ್ಥಳೀಯರು ಅಥವಾ ಪೊಲೀಸರು ಭಾರತೀಯ ಗೂಢಚಾರರಿಗಾಗಿ ಹುಡುಕುತ್ತಿದ್ದಾರೆ ಎಂಬುದಕ್ಕೆ ಯಾವುದೇ ವಿಶ್ವಾಸಾರ್ಹ ವರದಿಗಳು ಅಥವಾ ಪುರಾವೆಗಳು ನಮಗೆ ಕಂಡುಬಂದಿಲ್ಲ.
ಒಟ್ಟಾರೆಯಾಗಿ ಹೇಳುವುದಾದರೆ, ದುರಂಧರ್ 2 ಬಿಡುಗಡೆಯಾದ ನಂತರ ಪಾಕಿಸ್ತಾನಿ ಪೊಲೀಸರು ಭಾರತೀಯ ಗೂಢಚಾರರನ್ನು ಹುಡುಕುತ್ತಿದ್ದಾರೆ ಎಂಬ ಹೇಳಿಕೆಯೊಂದಿಗೆ ವೈರಲ್ ಆಗುತ್ತಿರುವ ವೀಡಿಯೊ ಇತ್ತೀಚಿನದ್ದಲ್ಲ ಎಂದು ನಾವು ಖಚಿತವಾಗಿ ಹೇಳುತ್ತೇವೆ.
