Fact Check: ಬ್ರಹ್ಮಪುರಿ ಅರಣ್ಯ ಅತಿಥಿ ಗೃಹದಲ್ಲಿ ಹುಲಿ ದಾಳಿ? ಇಲ್ಲ, ವೀಡಿಯೊ ಎಐಯಿಂದ ರಚಿತವಾಗಿದೆ
ಮಹಾರಾಷ್ಟ್ರದ ಚಂದ್ರಾಪುರ ಜಿಲ್ಲೆಯ ಬ್ರಹ್ಮಪುರಿ ಅರಣ್ಯ ಅತಿಥಿ ಗೃಹದಲ್ಲಿ ಹುಲಿ ದಾಳಿ ನಡೆಸುತ್ತಿರುವ ಸಿಸಿಟಿವಿ ದೃಶ್ಯಾವಳಿಗಳನ್ನು ತೋರಿಸುವುದಾಗಿ ಹೇಳಿಕೊಳ್ಳುವ ವೀಡಿಯೊವೊಂದು ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿದೆ.
By - Vinay Bhat
Claim:ಬ್ರಹ್ಮಪುರಿ ಅರಣ್ಯ ಅತಿಥಿ ಗೃಹದ ಹೊರಗೆ ಹುಲಿಯೊಂದು ವ್ಯಕ್ತಿಯ ಮೇಲೆ ದಾಳಿ ಮಾಡುತ್ತಿರುವ ವೀಡಿಯೊ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.
Fact:ಈ ಹೇಳಿಕೆ ಸುಳ್ಳು. ಈ ವೀಡಿಯೊವನ್ನು AI ಬಳಸಿ ಕೃತಕವಾಗಿ ರಚಿಸಲಾಗಿದೆ.
ಮಹಾರಾಷ್ಟ್ರದ ಚಂದ್ರಾಪುರ ಜಿಲ್ಲೆಯ ಬ್ರಹ್ಮಪುರಿ ಅರಣ್ಯ ಅತಿಥಿ ಗೃಹದಲ್ಲಿ ಹುಲಿ ದಾಳಿ ನಡೆಸುತ್ತಿರುವ ಸಿಸಿಟಿವಿ ದೃಶ್ಯಾವಳಿಗಳನ್ನು ತೋರಿಸುವುದಾಗಿ ಹೇಳಿಕೊಳ್ಳುವ ವೀಡಿಯೊವೊಂದು ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿದೆ. ಮನೆಯ ಹೊರಗೆ ಕುಳಿತಿದ್ದ ವ್ಯಕ್ತಿಯೊಬ್ಬರ ಮೇಲೆ ಇದ್ದಕ್ಕಿದ್ದಂತೆ ಹುಲಿ ಬಂದು ದಾಳಿ ಮಾಡಿ ಎಳೆದುಕೊಂಡು ಹೋಗುವುದನ್ನು ಈ ವೀಡಿಯೊ ತೋರಿಸುತ್ತದೆ.
ಇನ್ಸ್ಟಾಗ್ರಾಮ್ ಬಳಕೆದಾರರೊಬ್ಬರು ಈ ವೀಡಿಯೊವನ್ನು ಹಂಚಿಕೊಂಡು, ‘‘ಬ್ರಹ್ಮಪುರಿ ಅರಣ್ಯ ಪ್ರದೇಶದ ಗೆಸ್ಟ್ ಹೌಸಿನಲ್ಲಿ ನಡೆದ ಘಟನೆ ನೋಡಿ’’ ಎಂದು ಬರೆದುಕೊಂಡಿದ್ದಾರೆ. (Archive)
Fact Check:
ಈ ಹೇಳಿಕೆ ಸುಳ್ಳು ಎಂದು ನ್ಯೂಸ್‌ಮೀಟರ್ ಕಂಡುಕೊಂಡಿದೆ. ವೈರಲ್ ಆಗಿರುವ ವೀಡಿಯೊ ಕೃತಕ ಬುದ್ಧಿಮತ್ತೆಯಿಂದ ರಚಿತವಾಗಿದ್ದು, ನಿಜವಾದ ಸಿಸಿಟಿವಿ ದೃಶ್ಯಾವಳಿಗಳಲ್ಲ.
ಬ್ರಹ್ಮಪುರಿ ಅರಣ್ಯ ಅತಿಥಿ ಗೃಹದಲ್ಲಿ ಹುಲಿ ದಾಳಿ ನಡೆದಿರುವ ಬಗ್ಗೆ ಯಾವುದೇ ವಿಶ್ವಾಸಾರ್ಹ ಸುದ್ದಿ ವರದಿಗಳು ಅಥವಾ ಅಧಿಕೃತ ದೃಢೀಕರಣಗಳು ಕೀವರ್ಡ್ ಹುಡುಕಾಟದಲ್ಲಿ ಕಂಡುಬಂದಿಲ್ಲ. ಈ ಘಟನೆ ನಡೆದಿರದೇ ಇರಬಹುದು ಮತ್ತು ದೃಶ್ಯಾವಳಿಗಳು ಕೃತಕವಾಗಿವೆ ಎಂದು ಇದು ನಮಗೆ ಸುಳಿವು ನೀಡಿತು.
ದೃಶ್ಯಗಳನ್ನು ಸೂಕ್ಷ್ಮವಾಗಿ ಗಮನಿಸಿದಾಗ, ಹಲವಾರು ನೈಜ್ಯತೆಗೆ ದೂರವಾದ ಅಂಶಗಳು ಕಂಡುಬಂದವು: ಮನುಷ್ಯನ ಚಲನೆಗಳು ಅಸ್ವಾಭಾವಿಕ ಮತ್ತು ರೊಬೊಟಿಕ್ ಆಗಿ ಕಾಣುತ್ತವೆ, ವಿಶೇಷವಾಗಿ ಆತ ಓಡಲು ಪ್ರಾರಂಭಿಸಿದಾಗ, ಅದು ನಿಜವಾದ ಚಲನೆಗಿಂತ ಅನಿಮೇಷನ್ ಅನ್ನು ಹೋಲುತ್ತದೆ.
ಹುಲಿ ಮನುಷ್ಯನನ್ನು ರಸ್ತೆಯ ಕಡೆಗೆ ಎಳೆದ ನಂತರ, ಆ ಮನುಷ್ಯ ಹುಲಿಯ ಜೊತೆ ಪ್ರಾಣಿಗಳಂತೆ ಓಡುವುದು ಕಾಣಬಹುದು, ಇದು ಕೃತಕವಾಗಿ ರಚಿಸಲಾಗಿದೆ ಎಂದು ಸೂಚಿಸುತ್ತದೆ.
