Fact Check: ವಿಮಾನದಲ್ಲಿ ಪ್ರಯಾಣಿಕರು ಜಗಳವಾಡಿದ ಎರಡು ವರ್ಷದ ಹಿಂದಿನ ವೀಡಿಯೊ ಸುಳ್ಳು ಕೋಮುವಾದಿ ಹೇಳಿಕೆಯೊಂದಿಗೆ ವೈರಲ್
44 ಸೆಕೆಂಡುಗಳ ವೀಡಿಯೊದಲ್ಲಿ ಪ್ರಯಾಣಿಕರು ಹಿಂದಿಯಲ್ಲಿ ಜಗಳವಾಡುತ್ತಿರುವುದು ಕಂಡುಬಂದಿದ್ದು, ವಿಮಾನದೊಳಗೆ ಐದು ಮುಸ್ಲಿಂ ಪುರುಷರ ಗುಂಪೊಂದು ಹಿಂದೂ ಪ್ರಯಾಣಿಕನ ಮೇಲೆ ಹಲ್ಲೆ ನಡೆಸಿದ್ದಾರೆ ಎಂದು ಅನೇಕ ಬಳಕೆದಾರರು ಹೇಳಿಕೊಳ್ಳುತ್ತಿದ್ದಾರೆ.
By Vinay Bhat
Claim:ವಿಮಾನದಲ್ಲಿ ಐದು ಜನ ಮುಸ್ಲಿಮರು ಒಬ್ಬ ಹಿಂದೂ ಮೇಲೆ ದಾಳಿ ಮಾಡುತ್ತಿದ್ದರೆ.
Fact:ಬ್ಯಾಂಕಾಕ್-ಕೋಲ್ಕತ್ತಾ ವಿಮಾನದಲ್ಲಿ ನಡೆದ ಘಟನೆಯಾಗಿದೆ. ಹಲ್ಲೆ ನಡೆಸಿದ ಇಬ್ಬರೂ ಪ್ರಯಾಣಿಕರು ಮುಸ್ಲಿಂ ಸಮುದಾಯಕ್ಕೆ ಸೇರಿದವರು.
ವಿಮಾನದೊಳಗೆ ಪ್ರಯಾಣಿಕರ ನಡುವಿನ ಜಗಳವನ್ನು ತೋರಿಸುವ ವೀಡಿಯೊವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. 44 ಸೆಕೆಂಡುಗಳ ವೀಡಿಯೊದಲ್ಲಿ ಪ್ರಯಾಣಿಕರು ಹಿಂದಿಯಲ್ಲಿ ಜಗಳವಾಡುತ್ತಿರುವುದು ಕಂಡುಬಂದಿದ್ದು, ಬಳಿಕ ಕೈ-ಕೈ ಮಿಲಾಯಿಸಿದ್ದಾರೆ. ಪರಿಸ್ಥಿತಿಯನ್ನು ಶಾಂತಗೊಳಿಸಲು ಕ್ಯಾಬಿನ್ ಸಿಬ್ಬಂದಿ ಮಧ್ಯಪ್ರವೇಶಿಸುವುದನ್ನು ಕಾಣಬಹುದು. ವಿಮಾನದೊಳಗೆ ಐದು ಮುಸ್ಲಿಂ ಪುರುಷರ ಗುಂಪೊಂದು ಹಿಂದೂ ಪ್ರಯಾಣಿಕನ ಮೇಲೆ ಹಲ್ಲೆ ನಡೆಸಿದ್ದಾರೆ ಎಂದು ಅನೇಕ ಬಳಕೆದಾರರು ಹೇಳಿಕೊಳ್ಳುತ್ತಿದ್ದಾರೆ.
ಫೇಸ್ಬುಕ್ ಬಳಕೆದಾರರೊಬ್ಬರು ಮಾರ್ಚ್ 22, 2025 ರಂದು ಈ ವೀಡಿಯೊವನ್ನು ಹಂಚಿಕೊಂಡು, ‘‘ಈ ವಿಡಿಯೋ ಬಹಳ ಮುಖ್ಯ. ಕೇವಲ ಐದು ಜನ ಮುಸ್ಲಿಮರು ಒಬ್ಬ ಹಿಂದೂ ಮೇಲೆ ದಾಳಿ ಮಾಡುತ್ತಿದ್ದರೆ ಆ ವಿಮಾನದ ತುಂಬಾ ಬರಿ ಹಿಂದುಗಳೆ ಕೂತಿದ್ದರು ತಮಾಷೆ ಎಂದು ನೋಡುತ್ತಿದ್ದರು. ಇದೇ ವಿಚಾರ ಉಲ್ಟಾಪಲ್ಟ ಆಗಿದ್ದರೆ ಇಡೀ ವಿಮಾನವೇ ಸ್ಪೋಟವಾಗುತ್ತಿತ್ತೇನೋ. ನೀವು ಸಂಬಂಧ ಹೊಂದಿರುವ ಯಾವುದೇ ದೊಡ್ಡ ಗುಂಪಿಗೆ ಅದನ್ನು ಕಳುಹಿಸಿ ಮತ್ತು ಅದನ್ನು ಕುಟುಂಬದ ಮಕ್ಕಳಿಗೆ ತಿಳಿಸಿ. ಈ ವೀಡಿಯೊವನ್ನು ನೋಡದೆ ಎಂದಿಗೂ ಅಳಿಸಬೇಡಿ, ಇಲ್ಲದಿದ್ದರೆ ನೀವು ಒಳ್ಳೆಯ ಕೆಲಸದಿಂದ ವಂಚಿತರಾಗುತ್ತೀರಿ. ಇದನ್ನು ನಾವು ಮತ್ತು ನಮ್ಮ ಮುಂದಿನ ಪೀಳಿಗೆಗೆ ನೋಡಬೇಕು, ಅವರ ಮಾತುಗಳನ್ನು ನಾವು ಕಾರ್ಯಗತಗೊಳಿಸಬೇಕು ಮತ್ತು ಕನಿಷ್ಠ 5-10 ಗುಂಪುಗಳಲ್ಲಿ ಹಂಚಿಕೊಳ್ಳಬೇಕು. ಪ್ರತಿಯೊಂದು ಕೆಲಸವನ್ನು ಇತರರಿಗೆ ಬಿಟ್ಟುಕೊಡಬೇಡಿ ಮತ್ತು ಕೆಲವು ಕಾರ್ಯಗಳನ್ನು ನೀವೇ ಮಾಡಬೇಕು. ಈಗ ನಾವು ಕೆಲಸಕ್ಕೆ ಇಳಿಯೋಣ, ಹಂಚಿಕೊಳ್ಳಿ ಮತ್ತು ಕ್ರಮ ತೆಗೆದುಕೊಳ್ಳೋಣ. ನಮಗೆ ಹಿಂದೂ ರಾಷ್ಟ್ರ ಬೇಕೋ ಬೇಡವೋ? ಇದನ್ನು ಅವನಿಗಾಗಿ ಮಾಡಬೇಕು, ಸರಿ?. ಪ್ರತಿಯೊಂದು ಕಾರಣಕ್ಕೂ ಮತ್ತು ವಿಚಾರಕ್ಕೂ ಸಹಾಯ ಮಾಡಲು ಮೋದಿ ಯೋಗಿ ಅಮಿತ್ ಶಾ ಬರುವುದಿಲ್ಲ. ದೇವರು ಕೊಟ್ಟ ಗಂಡಸ್ತನವನ್ನು ನೀವೇ ಸಮಯ ಬಂದಾಗ ಬಳಸಿಕೊಳ್ಳಿ’’ ಎಂದು ಬರೆದುಕೊಂಡಿದ್ದಾರೆ. (Archive)
Fact Check:
ಈ ಸುದ್ದಿಯ ಸತ್ಯಾಸತ್ಯತೆಯನ್ನು ನ್ಯೂಸ್ ಮೀಟರ್ ಪರಿಶೋದಿಸಿದಾಗ, ಈ ಘಟನೆ ಬ್ಯಾಂಕಾಕ್-ಕೋಲ್ಕತಾ ವಿಮಾನದಲ್ಲಿ ನಡೆದ ಪ್ರಯಾಣಿಕರ ನಡುವಿನ ಜಗಳ ಎಂದು ತಿಳಿದುಬಂದಿದೆ. ಹಾಗೆಯೆ ಇದರಲ್ಲಿ ಯಾವುದೇ ಕೋಮಿಕೋನವಿಲ್ಲ.
ನಿಜಾಂಶವನ್ನು ತಿಳಿಯಲು ನಾವು ವೈರಲ್ ವೀಡಿಯೊದ ಸ್ಕ್ರೀನ್ ಶಾಟ್ ತೆಗೆದುಕೊಂಡು ಗೂಗಲ್ನಲ್ಲಿ ರಿವರ್ಸ್ ಇಮೇಜ್ ಸರ್ಚ್ ಮಾಡಿದ್ದೇವೆ. ಆಗ ಜನವರಿ 14, 2022ರ ಟೈಮ್ಸ್ ಆಫ್‌ ಇಂಡಿಯಾ ಈ ಕುರಿತು ವರದಿ ಮಾಡಿರುವುದು ನಮಗೆ ಸಿಕ್ಕಿದೆ. ಇದರಲ್ಲಿರುವ ಮಾಹಿತಿಯ ಪ್ರಕಾರ, ‘‘ಟೇಕಾಫ್‌ ವೇಳೆ ಕ್ಯಾಬಿನ್ ಸಿಬ್ಬಂದಿ ಅವರ ಸುರಕ್ಷತಾ ಮಾನದಂಡಗಳನ್ನು ಪಾಲಿಸದ ಪ್ರಯಾಣಿಕರೊಬ್ಬರು ತಮ್ಮ ಸೀಟನ್ನು ಮುಂಬದಿಗೆ ಬರುವಂತೆ ಮಾಡಿರಲಿಲ್ಲ. ತಾವು ಬೆನ್ನು ನೋವಿನಿಂದ ಬಳಲುತ್ತಿರುವುದಾಗಿ ಹೇಳಿದ್ದರು. ಇದು ಸಿಬ್ಬಂದಿಯೊಂದಿಗೆ ಮಾತಿಗೆ ಕಾರಣವಾಗಿದ್ದು, ಈ ವೇಳೆ ಇತರ ಪ್ರಯಾಣಿಕರು ಅವರ ಮೇಲೆ ದಾಳಿ ಮಾಡಿದ್ದಾರೆ. ವೀಡಿಯೊದಲ್ಲಿ ಹಿಂದಿನ ಸೀಟಿನ ಪ್ರಯಾಣಿಕರು ಮುಂದಿನ ಸೀಟಿನ ವ್ಯಕ್ತಿಯೊಂದಿಗೆ ವಾದಿಸಿ ಅವರಿಗೆ ಹೊಡೆಯುವುದು ಮತ್ತು ಅವರ ಕನ್ನಡಕ ತೆಗೆದು ಪದೇ ಪದೇ ಮುಖಕ್ಕೆ ಹೊಡೆಯುವುದು ಕಾಣಬಹುದು’’ ಎಂದಿದೆ.
ಹಾಗೆಯೆ ದಿ ಹಿಂದೂ ಈ ಘಟನೆ ಬಗ್ಗೆ ಡಿಸೆಂಬರ್ 29, 2022 ರಂದು ಸಂಪೂರ್ಣವಾಗಿ ವರದಿ ಮಾಡಿದ್ದು, ‘‘2022ರ ಡಿಸೆಂಬರ್ 26 ರಂದು ಬ್ಯಾಂಕಾಕ್‌ನಿಂದ ಕೋಲ್ಕತ್ತಾಗೆ ಹೊರಟ ಥಾಯ್ ಸ್ಮೈಲ್ ಏರ್‌ವೇಸ್ ವಿಮಾನದಲ್ಲಿ ಈ ಘಟನೆ ಸಂಭವಿಸಿದೆ. 37C ಸೀಟಿನಲ್ಲಿ ಕುಳಿತಿದ್ದ ಅಮಿದ್ ಮೊಹಮ್ಮದ್ ಹುಸೇನ್ ಎಂಬಾತನಿಗೆ ಬೆನ್ನು ನೋವು ಕಾಣಿಸಿಕೊಂಡಿದ್ದರಿಂದ ತಮ್ಮ ಆಸನವನ್ನು ನೇರಗೊಳಿಸುವುದು ಮತ್ತು ಸೀಟ್‌ಬೆಲ್ಟ್ ಧರಿಸುವುದು ಮುಂತಾದ ಸುರಕ್ಷತಾ ಕ್ರಮಗಳನ್ನು ಪಾಲಿಸಲು ನಿರಾಕರಿಸಿದ್ದ. ಆಗ ವಿಮಾನದ ಸಿಬ್ಬಂದಿ ಎಷ್ಟೇ ಮನವಿ ಮಾಡಿಕೊಂಡರೂ ಮೊಹಮ್ಮದ್ ಹುಸೇನ್ ಸಹಕರಿಸಲಿಲ್ಲ. ಇದನ್ನು ವೀಕ್ಷಿಸುತ್ತಿದ್ದ ವಿಮಾನದ ಪ್ರಯಾಣಿಕರಲ್ಲಿ ಎಸ್.ಕೆ.ಅಜರುದ್ದೀನ್ ಎಂಬಾತ ಉದ್ರೇಕಗೊಂಡು ಹುಸೇನ್‌ನಿಗೆ ಕಪಾಳಮೋಕ್ಷ ಮಾಡುವ ಮೂಲಕ ಜಗಳಕ್ಕೆ ಮುಂದಾದ. ಇನ್ನೂ ಈ ವಾಗ್ವಾದದಲ್ಲಿ ಇತರ ಹಲವಾರು ಪ್ರಯಾಣಿಕರು ಸೇರಿಕೊಂಡಿದ್ದರು. ಏರ್‌ಲೈನ್ಸ್ ಸಿಬ್ಬಂದಿ ಮಧ್ಯಪ್ರವೇಶಿಸಿ ತಾರಕಕ್ಕೇರಿದ ಪರಿಸ್ಥಿತಿಯನ್ನು ಶಾಂತಗೊಳಿಸಲು ಎಷ್ಟೇ ಪ್ರಯತ್ನ ಪಟ್ಟರೂ ಯಾರೊಬ್ಬರೂ ಸಹಕರಿಸಲಿಲ್ಲ. ಜಗಳದಲ್ಲಿ ಪಾಲ್ಗೊಂಡ ಪ್ರಯಾಣಿಕರ ವಿರುದ್ಧ ದೂರು ದಾಖಲಿಸಲಾಯಿತು’’ ಎಂದು ಬರೆಯಲಾಗಿದೆ. ಅಲ್ಲದೆ ಮಾಧ್ಯಮ ವರದಿಗಳಲ್ಲಿ ಯಾವುದೇ ಕೋಮು ಗಲಾಟೆಯ ಉದ್ದೇಶದ ಉಲ್ಲೇಖವಿಲ್ಲ.
ಈ ಪ್ರಕರಣದ ಕುರಿತ ಇನ್ನಷ್ಟು ಮಾಧ್ಯಮ ವರದಿಗಳನ್ನು ಇಲ್ಲಿ, ಇಲ್ಲಿ, ನೋಡಬಹುದು.
ಹೀಗಾಗಿ ವಿಮಾನದಲ್ಲಿ ಹಲ್ಲೆ ಆಗಿರುವ ಈ ವೀಡಿಯೊ 26 ಡಿಸೆಂಬರ್ 2022 ರಂದು ಬ್ಯಾಂಕಾಕ್-ಕೋಲ್ಕತ್ತಾ ವಿಮಾನದಲ್ಲಿ ನಡೆದ ಘಟನೆಯಾಗಿದೆ. ಹಲ್ಲೆ ನಡೆಸಿದ ಇಬ್ಬರೂ ಪ್ರಯಾಣಿಕರು ಒಂದೇ ಸಮುದಾಯಕ್ಕೆ ಸೇರಿದವರು. ಈ ಘಟನೆಯಲ್ಲಿ ಯಾವುದೇ ಕೋಮು ಕೋನವಿಲ್ಲ ಎಂದು ನಾವು ಖಚಿತವಾಗಿ ಹೇಳುತ್ತೇವೆ.
