Fact Check: ಯುಪಿಯಲ್ಲಿ ವಿದ್ಯಾರ್ಥಿಗಳು ತರಗತಿಯಲ್ಲಿ ಈಜಾಡುತ್ತಿರುವ ವೈರಲ್ ವೀಡಿಯೊ ಹಳೆಯದು

ಈ ಸುದ್ದಿಯ ಸತ್ಯಾಸತ್ಯತೆಯನ್ನು ನ್ಯೂಸ್ ಮೀಟರ್ ಪರಿಶೋಧಿಸಿದಾಗ, ಈ ವೈರಲ್ ವೀಡಿಯೊದ ಹಿಂದಿನ ನಿಜಾಂಶ ಏನು ಎಂಬುದು ತಿಳಿಯಿತು. ಸದ್ಯ ಹರಿದಾಡುತ್ತಿರುವ ವೀಡಿಯೊ ಸುಮಾರು ಮೂರು ತಿಂಗಳ ಹಳೇಯದ್ದಾಗಿದೆ. ತೀವ್ರ ಬಿಸಿಲಿನಿಂದ ಮಕ್ಕಳನ್ನು ತಂಪಾಗಿಸಲು ತರಗತಿಯ ಕೊಠಡಿಯಲ್ಲಿ ನೀರು ಹಾಕಲಾಗಿತ್ತು. ಈ ವೀಡಿಯೊಕ್ಕೆ ಈಹ ಬೇರೆ ರೂಪಕೊಟ್ಟು ವೈರಲ್ ಮಾಡಲಾಗುತ್ತಿದೆ ಎಂದು ನ್ಯೂಸ್‌ಮೀಟರ್ ಕಂಡುಕೊಂಡಿದೆ.

ನಿಜಾಂಶವನ್ನು ತಿಳಿಯಲು ನಾವು ವೈರಲ್ ಆಗುತ್ತಿರುವ ವೀಡಿಯೊದ ಸ್ಕ್ರೀನ್‌ಶಾಟ್ ಅನ್ನು ತೆಗೆದುಕೊಂಡು ಗೂಗಲ್‍ನಲ್ಲಿ ರಿವರ್ಸ್ ಇಮೇಜ್ ಸರ್ಚ್ ಮಾಡಿದೆವು. ಆಗ ಎನ್​ಡಿಟಿವಿ ಯೂಟ್ಯೂಬ್ ಚಾನಲ್‌ನಿಂದ ಏಪ್ರಿಲ್ 30, 2024 ರಂದು ಅಪ್‌ಲೋಡ್ ಮಾಡಲಾದ ವೀಡಿಯೊವನ್ನು ನಾವು ಕಂಡುಕೊಂಡಿದ್ದೇವೆ.

“ಭಾರತದಲ್ಲಿ ಬಿಸಿಲಿನ ಅಲೆ | ಯುಪಿಯ ಶಾಲೆಯಲ್ಲಿ ತಾಪಮಾನವು ಹೆಚ್ಚಾಗುತ್ತಿದ್ದಂತೆ ತರಗತಿಯನ್ನು ಈಜುಕೊಳವಾಗಿ ಪರಿವರ್ತಿಸಲಾಗಿದೆ'' ಎಂಬ ಶೀರ್ಷಿಕೆಯೊಂದಿಗೆ ವೀಡಿಯೊ ಪೋಸ್ಟ್ ಮಾಡಿದ್ದಾರೆ. ಶಾಲಾ ಮಕ್ಕಳನ್ನು ಬಿಸಿಗಾಳಿಯಿಂದ ರಕ್ಷಿಸಲು ತರಗತಿ ಕೊಠಡಿಗಳನ್ನು ಬದಲಾಯಿಸಲಾಗಿದೆ ಎಂದು ವಿವರಿಸಲಾಗಿದೆ.

ಎನ್​ಡಿಟಿವಿ ವರದಿಯ ಪ್ರಕಾರ, ಉತ್ತರ ಪ್ರದೇಶದ ಕನ್ನೌಜ್‌ನಲ್ಲಿರುವ ಶಾಲೆಯೊಂದು ಬಿಸಿಲಿನ ಶಾಖವನ್ನು ಎದುರಿಸಲು ಈ ವಿಶೇಷ ನಿರ್ಧಾರವನ್ನು ತೆಗೆದುಕೊಂಡಿದೆ. ತಾಪಮಾನವು 40 ಡಿಗ್ರಿ ಸೆಲ್ಸಿಯಸ್‌ಗೆ ಏರುತ್ತಿದ್ದಂತೆ, ವಿದ್ಯಾರ್ಥಿಗಳನ್ನು ತಂಪಾಗಿಸಲು ಮತ್ತು ಶಾಲೆಗೆ ಹಾಜರಾಗಲು ಪ್ರೋತ್ಸಾಹಿಸಲು ತರಗತಿಯನ್ನು ತಾತ್ಕಾಲಿಕ ಈಜುಕೊಳವಾಗಿ ಪರಿವರ್ತಿಸಲಾಗಿದೆ ಎಂದು ಬರೆಯಲಾಗಿದೆ.

ಮಿರರ್ ನೌ, ಟೈಮ್ಸ್ ನೌ, ಝೀ ಬ್ಯುಸಿನೆಸ್ ಮಾಧ್ಯಮಗಳು ಕೂಡ ಯುಪಿಯ ಕಣ್ಣೂರಿನ ಶಾಲೆಯೊಂದರ ಈ ವೀಡಿಯೊವನ್ನು ಏಪ್ರಿಲ್ 2024 ರಲ್ಲಿ ಅಪ್‌ಲೋಡ್ ಮಾಡಿದೆ. ಅಲ್ಲಿ ವಿದ್ಯಾರ್ಥಿಗಳ ಹಾಜರಾತಿಯನ್ನು ಹೆಚ್ಚಿಸಲು ಮತ್ತು ಬಿಸಿಯ ಶಾಖವನ್ನು ನಿಭಾಯಿಸಲು ತರಗತಿಯನ್ನು ಈಜುಕೊಳವಾಗಿ ಪರಿವರ್ತಿಸಲಾಗಿದೆ ಎಂದು ಹೇಳಲಾಗಿದೆ.

ಹೀಗಾಗಿ ಉತ್ತರ ಪ್ರದೇಶದಲ್ಲಿ ಭಾರೀ ಮಳೆಯಿಂದಾಗಿ ತರಗತಿಯೊಂದು ಈಜು ಕೊಳವಾಗಿದೆ ಎಂದು ಬಿಂಬಿಸುತ್ತಿರುವ ವೈರಲ್ ಪೋಸ್ಟ್ ಸುಳ್ಳಾಗಿದೆ. ಈ ವೀಡಿಯೊ ಹಳೆಯದಾಗಿದ್ದು, ವಿದ್ಯಾರ್ಥಿಗಳ ಅನುಕೂಲಕ್ಕಾಗಿ ಈರೀತಿ ಮಾಡಲಾಗಿದೆ ಎಂದು ನಾವು ಖಚಿತಪಡಿಸುತ್ತೇವೆ.