Fact Check: ചാമ്പ്യൻസ് ട്രോഫി നടക്കാനിരിക്കുന്ന പാക്കിസ്ഥാനിലെ സ്റ്റേഡിയത്തിന്റെ ശോചനീയാവസ്ഥ? വാസ്തവമറിയാം
2025 ഫെബ്രുവരി 19നാണ് ചാമ്പ്യൻസ് ട്രോഫി അന്താരാഷ്ട്ര ക്രിക്കറ്റ് മത്സരങ്ങൾ ആരംഭിക്കുന്നത്.
By Newsmeter Network Published on 29 Jan 2025 6:47 PM IST
Claim: ചാമ്പ്യൻസ് ട്രോഫി നടക്കാനിരിക്കുന്ന പാക്കിസ്ഥാനിലെ റാവൽപിണ്ടി സ്റ്റേഡിയത്തിന്റെ ശോചനീയാവസ്ഥ.
Fact: പ്രചാരണം തെറ്റിദ്ധരിപ്പിക്കുന്നത്. ടൂർണമെന്റിനായി തയ്യാറെടുപ്പുകൾ നടക്കുന്ന സ്റ്റേഡിയത്തിലെ പണിതീരാത്ത ഇരിപ്പിടങ്ങളുടെ ചിത്രമാണിത്.
ഫെബ്രുവരി 19ന് നടക്കാനിരിക്കുന്ന ചാമ്പ്യൻസ് ട്രോഫി അന്താരാഷ്ട്ര ക്രിക്കറ്റ് മത്സരത്തിനായുള്ള പാക്കിസ്ഥാനിലെ റാവൽപിണ്ടി സ്റ്റേഡിയത്തിന്റെ ശോചനീയാവസ്ഥ എന്ന അവകാശവാദത്തോടെ ഒരു ചിത്രം സമൂഹമാധ്യമങ്ങളിൽ പ്രചരിക്കുന്നു.
ക്രമരഹിതമായും അലങ്കോലപ്പെട്ടും കിടക്കുന്ന ഗാലറിയിലെ ഇരിപ്പിടങ്ങളുടെ ചിത്രമാണ് പ്രചരിക്കുന്നത്. സ്റ്റേഡിയത്തിൽ കാണികൾക്ക് ഇരിക്കാനായി ക്രമീകരിച്ചിരിക്കുന്ന ഇരിപ്പടങ്ങളുടെ പരിതാപകരമായ അവസ്ഥ എന്ന തരത്തിലാണ് പ്രചാരണം.
Fact-check:
പ്രചാരണം തെറ്റിദ്ധരിപ്പിക്കുന്നതാണെന്നും ടൂര്‍ണമെന്റിനായി തയ്യാറെടുപ്പുകള്‍ നടക്കുന്ന സ്റ്റേഡിയത്തിലെ പണിതീരാത്ത ഇരിപ്പിടങ്ങളുടെ ചിത്രമാണ് പ്രചരിക്കുന്നതെന്നും അന്വേഷണത്തില്‍ വ്യക്തമായി.
ചാമ്പ്യന്‍സ് ട്രോഫി ക്രിക്കറ്റ് ടൂര്‍ണമെന്റിന്റെ സമയക്രമമാണ് ആദ്യം പരിശോധിച്ചത്. 2025 ഫെബ്രുവരി 19 നാണ് മത്സരം ആരംഭിക്കുന്നതെന്ന് കണ്ടെത്തി. തുടര്‍ന്ന് നടത്തിയ പരിശോധനയില്‍ മത്സരം നടക്കുന്ന സ്റ്റേഡിയങ്ങളിലെല്ലാം ഒരുക്കങ്ങള്‍ പുരോഗമിക്കുകയാണെന്ന സൂചന ലഭിച്ചു.
സ്റ്റേഡിയത്തിലെ പ്രവൃത്തികള്‍ പ്രസ്തുത സമയത്തിനകം പൂര്‍ത്തീകരിക്കാനാവുമോ എന്ന കാര്യത്തില്‍ പലകോണുകളില്‍നിന്നും സംശയങ്ങള്‍ ഉയരുന്നുണ്ടെങ്കിലും ടൂര്‍ണമെന്റിന് മുന്‍പായി ജോലികള്‍ പൂര്‍ത്തീകരിക്കാനാവുമെന്നാണ് അധികൃതര്‍ പറയുന്നത്. ഇതുസംബന്ധിച്ച് ദി ന്യൂ ഇന്ത്യന്‍ എക്സ്പ്രസ് വാര്‍ത്ത നല്‍കിയിട്ടുണ്ട്.
ഇതോടെ പ്രചാരണം തെറ്റിദ്ധരിപ്പിക്കുന്നതാണെന്നും റാവല്‍പിണ്ടി ഉള്‍പ്പെടെ ടൂര്‍മണമെന്റ് നടക്കാനിരിക്കുന്ന മൂന്ന് സ്റ്റേഡിയങ്ങളിലും നവീകരണം പുരോഗമിക്കുകയാണെന്നും സ്ഥിരീകരിച്ചു.
