Fact Check: KSRTC യിൽ ഹജ്ജ് - ശബരിമല തീര്‍ത്ഥാടകര്‍ക്ക് വ്യത്യസ്ത നിരക്കോ? വാസ്തവമറിയാം
ഹജ്ജ് തീര്‍ത്ഥാടകര്‍ക്ക് ടിക്കറ്റ് നിരക്കില്‍ 30% ഇളവും ശബരിമല തീര്‍ത്ഥാടകര്‍ക്ക് 35% അധികനിരക്കും KSRTC ഈടാക്കുന്നുവെന്നാണ് പ്രചരണം.
By Newsmeter Network Published on 28 Nov 2024 9:39 AM GMT
Claim: ഹജ്ജ് യാത്രികര്‍ക്ക് നിരക്കിളവും ശബരിമല തീര്‍ത്ഥാടകര്‍ക്ക് അധികനിരക്കും ഏർപ്പെടുത്തി കെ എസ് ആർ ടി സി.
Fact: പ്രചാരണം തെറ്റിദ്ധരിപ്പിക്കുന്നത്; KSRTC 30 ശതമാനം നിരക്കിളവ് നൽകുന്നത് 140 കിലോമീറ്ററിലധികം ദൈര്‍ഘ്യമുള്ള പുതുതായി ആരംഭിച്ച 223 സര്‍വീസുകള്‍ക്കാണെന്നും KSRTC ഈടാക്കുന്ന അധികനിരക്ക് ഉത്സവകാല പ്രത്യേകനിരക്കാണെന്നും വ്യക്തമായി.
KSRTC ബസ്സുകളില്‍ തീർത്ഥാടനത്തിന് പോകുന്നവർക്കിടയിൽ പ്രത്യേക മതവിഭാഗങ്ങള്‍ക്ക് നിരക്കിളവ് നല്‍കുന്നതായി സമൂഹമാധ്യമങ്ങളില്‍ പ്രചാരണം. സര്‍ക്കാര്‍ മതപരമായ വിവേചനം കാണിക്കുകയാണെന്ന് ആരോപിച്ചു കൊണ്ടുള്ള പ്രചരണത്തിൽ ഒരു പത്രവാര്‍ത്തയും KSRTC ബസ്സിലൊട്ടിച്ച സ്റ്റിക്കറിന്റെ ചിത്രവും കാണാം.
'വഴി : ഹജ്ജ് ക്യാമ്പ്' എന്നും താഴെ 'ഈ ബസ്സിൽ 30% ഇളവ്' എന്നുമുള്ള സ്റ്റിക്കറുകൾ പതിപ്പിച്ച KSRTC യുടെ മുൻവശത്തിന്റെ ചിത്രവും ശബരിമല തീര്‍ത്ഥാടകര്‍ക്ക് 35% അധികനിരക്കെന്ന പത്രവാര്‍ത്തയും ഉള്‍പ്പെടുത്തിയാണ് പ്രചാരണം. പമ്പയിലേക്ക് സർവീസുള്ള ബസ്സുകൾ ശബരിമല സ്പെഷ്യൽ ആക്കുകയാണെന്നും ഈ സർവീസുകളിൽ അധിക നിരക്ക് ഈടാക്കുമെന്നും പത്രവാർത്തയിൽ പറയുന്നതായി കാണാം.
Fact-check:
പ്രചാരണം തെറ്റിദ്ധരിപ്പിക്കുന്നതാണെന്നും രണ്ട് ചിത്രങ്ങളും പഴയതാണെന്നും അന്വേഷണത്തില്‍ വ്യക്തമായി.
KSRTC ബസ്സിന് മുന്നില്‍ 30% നിരക്കിളവ് സൂചിപ്പിക്കുന്ന സ്റ്റിക്കര്‍ പതിച്ച ചിത്രമാണ് ആദ്യം പരിശോധിച്ചത്. കെഎസ്ആര്‍ടിസി, 30 ശതമാനം തുടങ്ങിയ കീവേഡുകള്‍ ഉപയോഗിച്ച് നടത്തിയ തെരച്ചിലില്‍ ചില മാധ്യമറിപ്പോര്‍ട്ടുകള്‍ ലഭ്യമായി. KSRTC പുതുതായി ഏറ്റെടുത്ത റൂട്ടുകളില്‍ 140 കിലോമീറ്ററിലധികം ദൈര്‍ഘ്യമുള്ളവയില്‍ 30 ശതമാനം നിരക്ക് ഇളവ് നല്‍കുന്നതായി വാര്‍ത്ത മിക്ക മുഖ്യധാരാ മാധ്യമങ്ങളിലും 2023 ഏപ്രില്‍ 13-14 തിയതികളിലായി പ്രസിദ്ധീകരിച്ചിട്ടുണ്ട്.
സ്വകാര്യ ബസ്സുകളുടെ അനധികൃത സര്‍വീസ് തടയാനും യാത്രക്കാരെ ആകര്‍ഷിക്കാനും വേണ്ടിയാണ് നിരക്കിളവ് നടപ്പാക്കുന്നതെന്ന് ഏഷ്യാനെറ്റ് ന്യൂസ് റിപ്പോര്‍ട്ട് ചെയ്യുന്നു.
The Hindu വും ഇതേ വാര്‍ത്ത ഏപ്രില്‍ 14ന് പ്രസിദ്ധീകരിച്ചിട്ടുണ്ട്.
ഇതോടെ 30 ശതമാനം നിരക്കിളവ് KSRTC നല്‍കിയിരിക്കുന്നത് 140 കിലോമീറ്ററിലധികം ദൈര്‍ഘ്യമുള്ള പുതുതായി ആരംഭിച്ച 223 സര്‍വീസുകള്‍ക്കാണെന്ന് വ്യക്തമായി. പ്രചരിക്കുന്ന ചിത്രത്തില്‍നിന്ന് ബസ്സ് മലപ്പുറം, പെരിന്തല്‍മണ്ണ, മണ്ണാര്‍ക്കാട് വഴി പാലക്കാട്ടേക്ക് പോകുന്നതാണെന്ന് വ്യക്തമാണ്. 140 കിലോമീറ്ററിലധികം ദൈര്‍ഘ്യം വരുന്ന 223 ടേക്ക് ഓവര്‍ സര്‍വീസുകളില്‍ ഒന്നായിരിക്കാം ഇത്.
ഇതുകൂടാതെ പ്രത്യേക മതവിഭാഗങ്ങള്‍ക്കായി യാതൊരു ഇളവും നല്‍കുന്നില്ലെന്ന് KSRTC അധികൃതരും വ്യക്തമാക്കി.
തുടര്‍ന്ന് ചിത്രത്തില്‍ നല്‍കിയിരിക്കുന്ന പത്രവാര്‍ത്ത പരിശോധിച്ചു. പ്രസക്തമായ കീവേഡുകള്‍ ഉപയോഗിച്ച് നടത്തിയ പരിശോധനയില്‍ സമാനമായ നിരവധി റിപ്പോര്‍ട്ടുകള്‍ 2022 ല്‍ പ്രസിദ്ധീകരിച്ചതായി കണ്ടെത്തി. എന്നാല്‍ ഇത്തരത്തില്‍ പുതിയ വാര്‍ത്തയൊന്നും കണ്ടെത്താനുമായില്ല.
