Fact Check: லேடி வில்லிங்டன் பள்ளி கழிப்பறையின் அவல நிலை என்று பரவும் புகைப்படம்? திமுக ஆட்சியில் எடுக்கப்பட்டதா
திமுக ஆட்சியில் முறையான பராமரிப்பின்றி, 108 ஆண்டுகள் பழமையான சென்னை லேடி வில்லிங்டன் பள்ளி கழிப்பறைகள் சிதிலமடைந்துள்ளதைச் சுட்டிக்காட்டி சமூக வலைதளங்களில் விமர்சனங்கள் எழுந்துள்ளன
By Newsmeter Network
Claim:திமுக ஆட்சியில் சென்னை திருவல்லிக்கேணியில் உள்ள வரலாற்றுச் சிறப்புமிக்க லேடி வில்லிங்டன் பள்ளி கழிப்பறைகளின் மோசமான நிலை குறித்த புகைப்படங்கள்
Fact:இத்தகவல் தவறானது. வைரலாகும் புகைப்படம் 2015ஆம் ஆண்டு எடுக்கப்பட்டது என்று தெரியவந்தது
சென்னை திருவல்லிக்கேணியில் உள்ள லேடி வில்லிங்டன் பள்ளி கழிப்பறையின் அவல நிலை, திமுக ஆட்சியில் 108 வருட பழமையான பள்ளியின் நிலை என்று சமூக வலைதளங்களில் புகைப்படம் வைரலாகி வருகிறது.
Fact check:
நியூஸ் மேட்டரின் ஆய்வில் வைரலாகும் புகைப்படம் 2015ஆம் ஆண்டு எடுக்கப்பட்ட பழைய புகைப்படம் என்று தெரியவந்தது.
சமூக வலைதளங்களில் வைரலாகி வரும் திருவல்லிக்கேணி லேடி வில்லிங்டன் பள்ளி கழிப்பறை தொடர்பான புகைப்படத்தின் உண்மைத்தன்மையை கண்டறிய முறையான ஆய்வை மேற்கொண்டோம்.
பரப்பப்படும் அந்தப் புகைப்படத்தை 'ரிவர்ஸ் இமேஜ் சர்ச்' செய்து பார்த்தபோது, அது தற்போதையதல்ல என்பது உறுதியானது.
கடந்த அக்டோபர் 21, 2015 அன்று டைம்ஸ் ஆஃப் இந்தியா (Times of India) வெளியிட்டிருந்த "Thousand girls suffer as School loos remain closed" என்ற செய்திக் கட்டுரையில் இந்தப் புகைப்படம் முதன்முதலில் இடம்பெற்றுள்ளது. 2013-ல் ரூ. 2.5 லட்சம் மதிப்பில் கட்டப்பட்ட கழிப்பறைகள், முறையான பராமரிப்பு மற்றும் தூய்மைப் பணியாளர்களுக்கு ஊதியம் வழங்கப்படாத காரணத்தால் சிதிலமடைந்ததாக அந்தச் செய்தியில் குறிப்பிடப்பட்டிருந்தது.
தொடர்ந்து மேற்கொண்ட தேடலில், மார்ச் 11, 2017 அன்று வெளியான மற்றொரு செய்திக்குறிப்பில், லேடி வில்லிங்டன் கல்லூரியைப் புனரமைக்க பள்ளிக்கல்வி இயக்குநரகம் சுமார் ரூ. 40 லட்சம் நிதி ஒதுக்கிய தகவல் கிடைத்துள்ளது. மேலும், சில தனியார் தொண்டு நிறுவனங்களின் பங்களிப்போடு பள்ளியின் வகுப்பறைகள் மற்றும் கழிப்பறைகள் சீரமைக்கப்பட்ட செய்திகளும் ஆவணப்படுத்தப்பட்டுள்ளன.
குறிப்பாக, இந்தப் புகைப்படம் எடுக்கப்பட்ட 2015-ம் ஆண்டில் அஇஅதிமுக தலைமையிலான அரசு ஆட்சியில் இருந்தது. ஆனால், தற்போது அக்டோபர் 10, 2022 அன்று எடுக்கப்பட்ட கள ஆய்வுச் செய்திகளின்படி, பள்ளிக்கல்வித்துறை அமைச்சர் அன்பில் மகேஷ் மற்றும் அப்போதைய இளைஞர் நலன் மற்றும் விளையாட்டு மேம்பாட்டுத்துறை அமைச்சர் உதயநிதி ஸ்டாலின் ஆகியோர் இந்தப் பள்ளியின் உள்கட்டமைப்புகளை நேரில் ஆய்வு செய்துள்ளனர். அப்போது வெளியான புகைப்படங்கள் பள்ளியின் தற்போதைய மேம்படுத்தப்பட்ட நிலையை உறுதிப்படுத்துகின்றன.
Conclusion:
முடிவாக நம் தேடலில், திருவல்லிக்கேணி லேடி வில்லிங்டன் பள்ளி கழிப்பறையின் அவல நிலை எனப் பகிரப்படும் புகைப்படம் 2015ஆம் ஆண்டு எடுக்கப்பட்ட பழைய படம் என்பது ஆதாரங்களுடன் நிரூபிக்கப்பட்டுள்ளது.
