سکھ برادری کے احتجاج کی یہ ویڈیو تین ماہ پُرانی ہے

خالصتان تحریک کے رُکن ہردیپ سنگھ نجر کے قتل کے بعد سے بھارت اور کینیڈا کے درمیان کشیدگی بڑھ گئی ہے۔ کنیڈا نے ہردیپ سنگھ کے قتل کا الزام بھارت پر عائد کیا ہے۔ اب اس سلسلے میں سوشل میڈیا پر مختلف دعوے وائرل ہورہے ہیں۔

ان دنوں سوشل میڈیا پر سکھ برادری کی طرف سے احتجاج کی ایک ویڈیو وائرل ہورہی ہے۔ ویڈیو سے متعلق صارفین کا دعویٰ ہے کہ کینیڈا میں سکھ رہنما کے قتل کے بعد حال ہی میں بھارت کے امرتسر میں راء آفس کے سامنے سکھوں نے احتجاج کیا۔

ایک ایکس صارفِ نے احتجاج کی ویڈیو کو شیئر کرتے ہوئے لکھا 'کینیڈا میں ہردیپ سنگھ نجار کے قتل کے خلاف امرتسر میں راء کے دفتر کے سامنے مظاہرے پھوٹ پڑے۔ سکھ خالصتان زندہ باد کے نعرے لگا رہے ہیں'۔

اس ویڈیو کو فیس بک صارفین نے بھی شیئر کیا، جس کا لنک آپ یہاں، اور یہاں دیکھ سکتے ہیں۔

Fact Check

نیوز میٹر کی تحقیقات میں ثابت ہوا کہ ویڈیو تین ماہ پُرانی ہے۔

ہم نے ویڈیو کے کیفریمز کو ریورس امیج سرچ کیا، اس دوران ہمیں دی ٹریبیون ویب سائٹ پر رواں برس 1 جولائی کی ایک رپورٹ ملی۔

رپورٹ میں کہا گیا ہے کہ 'پولیس نے دل خالصہ کے ان کارکنوں کو حراست میں لے لیا جو ہفتہ کو یہاں بیرونی ممالک میں سکھ علیحدگی پسندوں کے قتل کے خلاف بھارت کی خفیہ ایجنسی راء کے مقامی دفتر کے باہر احتجاج کر رہے تھے۔ حراست میں لیے گئے افراد کو بعد میں پولیس نے رہا کر دیا'۔

سرچ کے دوران ہمیں دی پرنٹ کی ایک رپورٹ بھی ملی جس میں اس احتجاج سے متعلق رپورٹ شائع کی گئی ہے۔

اس کے علاوہ ہمیں یہی تصویریں ٹی وی 84 نامی یوٹیوب چینل پر اپلوڈ شدہ ویڈیو میں بھی ملیں۔ ویڈیو کے ڈسکرپشن میں بھی یہی تفصیل لکھی گئی ہے اور تین ماہ قبل اپلوڈ کی گئی ہے۔

ہم دعوے کے ساتھ کہہ سکتے ہیں کہ احتجاج کی یہ ویڈیو تین ماہ پُرانی ہے۔ لہذا اس ویڈیو سے متعلق کیا جارہا دعویٰ غلط ہے۔