Fact Check: బీఎంసీ ఎన్నికల ఫలితాల తర్వాత బీజేపీ నాయకుడు కె. అన్నామలై డాన్స్? లేదు, నిజం ఇక్కడ తెలుసుకోండి
బీజేపీ నాయకుడు కె. అన్నామలై ముంబై బీఎంసీ ఎన్నికలలో పార్టీ విజయం అనంతరం డాన్స్ చేస్తున్నట్లు సోషల్ మీడియాలో వైరల్ అవుతున్న వీడియో.
By - K Sherly Sharon
Claim:ముంబై బీఎంసీ ఎన్నికలలో పార్టీ విజయం అనంతరం బీజేపీ నాయకుడు కె. అన్నామలై ‘లుంగీ డ్యాన్స్’ పాటపై డాన్స్ వేశారు.
Fact:ఈ క్లెయిమ్లో నిజం లేదు. ఈ వీడియో కనీసం 2023 నుండి ఆన్లైన్లో ప్రచారంలో ఉంది. ఇది తమిళనాడులో జరిగిన 'ఎన్ మన్ ఎన్ మక్కల్' పాదయాత్ర సమయంలో చిత్రీకరించబడింది.
Hyderabad: జనవరి 16న బృహన్ముంబై మున్సిపల్ కార్పొరేషన్ (బీఎంసీ) ఎన్నికల ఫలితాలు ప్రకటించిన తర్వాత, భారతీయ జనతా పార్టీ (బీజేపీ) నాయకుడు కె. అన్నామలై నృత్యం చేస్తున్న వీడియో సోషల్ మీడియాలో వైరల్ అయింది.
శివసేనతో కలిసి బీజేపీ నేతృత్వంలోని మహాకూటమి ముంబై బీఎంసీ ఎన్నికలలో మెజారిటీని సాధించింది. బీజేపీ 89 స్థానాలతో స్పష్టమైన ముందంజలో నిలవగా, శివసేన (యూబీటీ) 65 వార్డులను గెలుచుకుంది. షిండే నేతృత్వంలోని శివసేన 29 స్థానాలను గెలుచుకోగా, కాంగ్రెస్ 24 స్థానాలతో సరిపెట్టుకుంది.
ఎన్నికలకు ముందు, అన్నామలై బీజేపీ అభ్యర్థి తేజిందర్ సింగ్ తివానా కోసం ప్రచారం చేశారు. ఈ నేపథ్యంలో, బీఎంసీ ఎన్నికలలో బీజేపీ విజయం అనంతరం అన్నామలై 'లుంగీ డాన్స్' అనే పాటపై నృత్యం చేశారు అనే క్లెయిమ్తో వైరల్ వీడియోను షేర్ చేస్తున్నారు.
ఈ వీడియోలో బీఎంసీ ఎన్నికల ఫలితాలు “బీజేపీ+ 114, యూబీటీ+ ఎన్సీపీ ఎస్పీ 70, ముంబై 201/227” అని చూపిస్తున్నాయి.
వైరల్ వీడియోలో ఇలా రాసి ఉంది, “ముంబై BJP విజయోత్సవ సంబరాలను జరుపుకుంటున్న సింగం అన్నామలై స్టెప్లు చూసి కంగుతిన్న కల్తీ ఠాక్రే గాళ్ళు”.
ఈ వీడియోను అదే టెక్స్ట్తో ఫేస్బుక్లో షేర్ చేశారు. ఈ ఫేస్బుక్ పోస్ట్ ఇప్పుడు తొలగించబడింది. (ఆర్కైవ్)
ఇవే క్లెయిమ్లతో మరొక పోస్ట్ను షేర్ చేసారు, క్యాప్షన్లో ఇలా రాశారు, “రాజ్ టి & కుటుంబం, ఈ లుంగీ డ్యాన్స్ ఎలా ఉంది?”(ఆర్కైవ్)
Fact Check
ఈ క్లెయిమ్లు అవాస్తవమని న్యూస్మీటర్ కనుగొంది. ఈ వైరల్ వీడియో కనీసం సెప్టెంబర్ 24, 2023 నుండి ఆన్లైన్లో ప్రచారంలో ఉంది. దీనిని తమిళనాడులో జరిగిన 'ఎన్ మన్ ఎన్ మక్కల్' పాదయాత్ర సమయంలో చిత్రీకరించారు.
కీవర్డ్ సెర్చ్ ద్వారా ఇదే వీడియో పొడిగించిన వెర్షన్ను 'తమిళ్ జనమ్' అనే యూజర్ సెప్టెంబర్ 26, 2023న ఇన్స్టాగ్రామ్లో అప్లోడ్ చేసినట్లు కనుగొన్నాం. వైరల్ వీడియో, ఇన్స్టాగ్రామ్ వీడియోల నుండి తీసిన స్క్రీన్షాట్ల పోలికను చూపే చిత్రాన్ని క్రింద చూడవచ్చు.
ఇన్స్టాగ్రామ్ పోస్ట్ క్యాప్షన్లో ఇలా ఉంది, “డాన్స్.. సెలబ్రేషన్.. | అన్నామలై డాన్స్ | జనం తమిళ్”.
నేషన్ ఫస్ట్ యూట్యూబ్ ఛానెల్ కూడా ఇదే సంఘటనకు సంబంధించిన వీడియోలను ఒక షార్ట్ వీడియో, 3 నిమిషాల నిడివి గల వీడియోల రూపంలో షేర్ చేసింది. పొడవైన వీడియో తమిళ శీర్షిక ఇలా ఉంది , “పాదయాత్ర సమయంలో అన్నామలై నృత్యం | బీజేపీ అన్నామలై డ్యాన్స్ వీడియో | ఎన్ మన్ ఎన్ మక్కల్” అని ఉంది.
'ఎన్ మన్, ఎన్ మక్కల్' అంటే 'నా భూమి, నా ప్రజలు' అని అర్థం. ఇది అప్పటి తమిళనాడు భారతీయ జనతా పార్టీ (బీజేపీ) అధ్యక్షుడైన కె. అన్నామలై నేతృత్వంలో జరిగిన ఆరు నెలల సుదీర్ఘ పాదయాత్ర. 2024 లోక్సభ ఎన్నికలకు ముందు నిర్ణయాత్మక తీర్పును కోరడమే ఈ పాదయాత్ర లక్ష్యం.
ఈ పాదయాత్రను కేంద్ర హోంమంత్రి అమిత్ షా జూలై 28, 2023న జెండా ఊపి ప్రారంభించారు. తమిళనాడులోని మొత్తం 234 అసెంబ్లీ నియోజకవర్గాలను సందర్శించే ప్రణాళికతో ఈ పాదయాత్ర ప్రారంభించారు.
ఇదే కార్యక్రమంలో అన్నామలై నృత్యం చేస్తున్న ఇతర వీడియోలను ఇక్కడ, ఇక్కడ చూడవచ్చు.
కాబట్టి, వైరల్ వీడియో కనీసం సెప్టెంబర్ 24, 2023 నుండి ఆన్లైన్లో ప్రచారంలో ఉందని స్పష్టమవుతోంది. దీనిని తమిళనాడులో జరిగిన 'ఎన్ మన్ ఎన్ మక్కల్' పాదయాత్ర సమయంలో చిత్రీకరించారు. ఈ వీడియోలలోని ఆడియో కూడా 'చెన్నై ఎక్స్ప్రెస్' సినిమాలోని 'లుంగీ డాన్స్' పాటకు భిన్నంగా ఉంది.
వైరల్ అవుతున్న వాదన అవాస్తవమని న్యూస్మీటర్ నిర్ధారించింది. ఈ ప్రశ్నార్థకమైన వీడియోలో బీజేపీ నాయకుడు కె. అన్నామలై బీఎంసీ ఎన్నికలలో బీజేపీ విజయం అనంతరం 'లుంగీ డాన్స్' పాటకు నృత్యం చేస్తున్నట్లు చూపించడం లేదు.
