Fact Check: సీఎం రేవంత్ రెడ్డికి ఛాతినొప్పి వచ్చి అపోలో ఆసుపత్రికి తరలించారా? లేదు, ఈ వైరల్ క్లెయిమ్ తప్పు

హైదరాబాద్: తెలంగాణ ముఖ్యమంత్రి ఏ. రేవంత్ రెడ్డి ఇటీవలి రోజులుగా ప్రభుత్వ కార్యక్రమాలు, ప్రజా సమావేశాల్లో చురుగ్గా పాల్గొంటున్నారు. జాతీయ నేతలతో భేటీలు, రాష్ట్రాభివృద్ధి అంశాలపై సమీక్షలు వంటి కార్యక్రమాల్లో ఆయన నిరంతరం పాల్గొంటున్నారు.

ఈ నేపథ్యంలో, “గత రాత్రి సుమారు 11:45 గంటలకు సీఎం రేవంత్ రెడ్డికి ఛాతినొప్పి వచ్చి, వెంటనే అపోలో ఆసుపత్రికి తరలించారు” అంటూ ఒక ఫేస్‌బుక్ పోస్టు వైరల్ అయింది. ఆ పోస్టులో, వైద్యులు తక్షణమే స్పందించి పరీక్షలు నిర్వహించారని, స్వల్ప న్యూరాలజికల్ సమస్య ఉండవచ్చని అనుమానం వ్యక్తం చేశారని, పలువురు సీనియర్ డాక్టర్లు ఆయన ఆరోగ్యాన్ని పర్యవేక్షిస్తున్నారని పేర్కొన్నారు.(Archive)

ఫ్యాక్ట్ చెక్

న్యూస్‌మీటర్ పరిశీలనలో ఈ క్లెయిమ్ పూర్తిగా తప్పు అని తేలింది. సీఎం రేవంత్ రెడ్డికి ఛాతినొప్పి వచ్చిందని గానీ, అపోలో ఆసుపత్రి లేదా మరే ఇతర ఆసుపత్రిలో ఆయన చేరారని గానీ ధృవీకరించే విశ్వసనీయ సమాచారం ఏది లభించలేదు.

2025 డిసెంబర్ 21 నాటికి వెలువడిన వార్తలను పరిశీలిస్తే, సీఎం రేవంత్ రెడ్డి సాధారణ ప్రభుత్వ కార్యక్రమాల్లో పాల్గొంటూ, అభివృద్ధి అంశాలపై మాట్లాడినట్లు స్పష్టంగా కనిపిస్తోంది.

Hon’ble Chief Minister Shri A. Revanth Reddy attended the prestigious “At Home” programme hosted by the Hon’ble President of India, Smt. Draupadi Murmu, at Rashtrapati Nilayam, Bolarum, in the august presence of the Hon’ble Governor of Telangana, Shri Jishnu Dev Varma.The… pic.twitter.com/oZYbTib4Me

— Telangana CMO (@TelanganaCMO) December 21, 2025

ముఖ్యమంత్రి కార్యాలయం, ప్రభుత్వ అధికారిక చానళ్లు లేదా ప్రముఖ మీడియా సంస్థల నుంచి ఎలాంటి వైద్య అత్యవసర పరిస్థితిపై ప్రకటనలు వెలువడలేదు. ఇటీవల జరిగిన ఆయన బహిరంగ కార్యక్రమాలు, వ్యాఖ్యలు ఆయన పూర్తిగా ఆరోగ్యంగా ఉన్నారని స్పష్టం చేస్తున్నాయి.

తెలంగాణ ప్రభుత్వ అధికారిక ఫ్యాక్ట్ చెక్ హ్యాండిల్ @FactCheck_TG కూడా ఈ వైరల్ వదంతిని ఎక్స్ (X)లో ఖండించింది. ముఖ్యమంత్రి ఆరోగ్యంపై కొంతమంది అసాంఘిక శక్తులు తప్పుడు ప్రచారం చేస్తున్నాయని, ఈ ఆరోపణలు పూర్తిగా నిరాధారమైనవని, దురుద్దేశపూరితమైనవని పేర్కొంది. సీఎం రేవంత్ రెడ్డి సంపూర్ణ ఆరోగ్యంతో ఉన్నారని, ఎలాంటి వైద్య పర్యవేక్షణలో లేరని స్పష్టం చేస్తూ, ఈ తప్పుడు సమాచారాన్ని ప్రచారం చేసిన ఫేస్‌బుక్ పోస్టుపై చట్టపరమైన చర్యలు తీసుకుంటామని కూడా హెచ్చరించింది. ప్రజలు ఇలాంటి ఫేక్ న్యూస్‌ను నమ్మవద్దని విజ్ఞప్తి చేసింది.

In a blatant and mischievous post circulated on social media, certain anti-social elements are attempting to spread false rumours about the health of Telangana Chief Minister A. Revanth Reddy.🔴 These claims are absolutely false, baseless, and malicious propaganda.🟢 The… pic.twitter.com/fA35GWdr9h

— FactCheck_Telangana (@FactCheck_TG) December 22, 2025

సీఎంఓ తెలంగాణ సమాచారం ప్రకారం, డిసెంబర్ 22, 2025న ముఖ్యమంత్రి షెడ్యూల్ ఇలా ఉంది:

సాయంత్రం 4 గంటలకు హకీంపేట్ ఎయిర్ ఫోర్స్ స్టేషన్‌లో భారత రాష్ట్రపతికి వీడ్కోలు కార్యక్రమంలో పాల్గొననున్నారు. అనంతరం సాయంత్రం 5 గంటలకు బంజారాహిల్స్‌లోని ఐసీసీసీ (ICCC)లో రాష్ట్ర మంత్రులందరితో సమావేశం పాల్గొంటారు.

ఈ అధికారిక కార్యక్రమాల షెడ్యూల్ కూడా ముఖ్యమంత్రి పూర్తిగా విధుల్లో ఉన్నారని స్పష్టంగా చూపిస్తోంది.

సీఎం రేవంత్ రెడ్డికి ఛాతినొప్పి వచ్చి అపోలో ఆసుపత్రికి తరలించారనే వైరల్ ఫేస్‌బుక్ క్లెయిమ్ పూర్తిగా తప్పు. ఈ ఆరోపణలకు ఎలాంటి ఆధారాలు లేవు, నమ్మదగిన ప్రముఖ వార్త సంస్థల నుంచి కూడా ఇలాంటి సమాచారం వెలువడలేదు.