ఫ్యాక్ట్ చెక్: రాహుల్ గాంధీతో సెల్ఫీ తీసుకున్న వ్యక్తి న్యాయమూర్తేనా? అసలు నిజాలు ఇవే
రాహుల్ గాంధీపై లఖనౌ కోర్టులో నడుస్తున్న కేసులో న్యాయమూర్తి ఆయనతో సెల్ఫీ తీసుకున్నట్టు పేర్కొంటూ ఒక ఫొటో సోషల్ మీడియాలో వైరల్ అవుతోంది.
By M Ramesh Naik
Claim:లఖనౌ కోర్టులో రాహుల్ గాంధీపై విచారణ జరుపుతున్న న్యాయమూర్తి, ప్రతిపక్ష నేతతో సెల్ఫీ తీసుకుంటూ అభిమాన మూడ్‌లో కనిపించారని ప్రచారం జరుగుతోంది.
Fact:ఈ ప్రచారం తప్పు. వైరల్ ఫొటోలో ఉన్న వ్యక్తి న్యాయమూర్తి కాదు. అతను న్యాయవాది సయ్యద్ మహ్మూద్ హసన్. ఆయన తన పని నిమిత్తం కోర్టుకు వచ్చి సెల్ఫీ తీసుకున్నట్టు స్పష్టం అయ్యింది.
హైదరాబాద్: జూలై 15న, డిసెంబర్ 16, 2022న భారత్ జోడో యాత్ర సందర్భంగా రాహుల్ గాంధీ చేసిన వ్యాఖ్యలపై లఖనౌ కోర్టు ఆయనకు బెయిల్ మంజూరు చేసింది. అరుణాచల్ ప్రదేశ్‌లో చైనా సైన్యం భారత సైనికులపై దాడి చేసిందని ఆయన చేసిన వ్యాఖ్యలు ఇండియన్ ఆర్మీని కించపరిచే విధంగా వ్యాఖ్యలు చేశారంటూ ఆరోపిస్తూ, BRO మాజీ డైరెక్టర్ ఉదయ్ శంకర్ శ్రీవాస్తవా దాఖలు చేసిన పరువు నష్టం కేసులో కోర్టు ఈ ఉత్తర్వులు జారీ చేసింది. తదుపరి విచారణ ఆగస్టు 13కి వాయిదా వేసింది.
ఈ నేపథ్యంలో, కోర్టు లోపల తీసిన ఓ ఫొటో సోషల్ మీడియాలో విపరీతంగా షేర్ అవుతోంది. ఇందులో నలుపు కోట్ ధరించిన వ్యక్తి, రాహుల్ గాంధీతో పాటు ఇతరులు కూడా ఫ్రేమ్‌లో కనిపిస్తున్నారు. ఇది చూస్తే, ఆ వ్యక్తి న్యాయమూర్తి అయినట్టుగా, అభిమానంతో రాహుల్‌తో సెల్ఫీ తీసుకున్నట్టుగా ప్రచారం చేస్తున్నారు.
ఒక X ఖాతా ఈ ఫొటోను షేర్ చేస్తూ, “జడ్జి లాప్ శ్రీ రాహుల్ గాంధీ గారితో సెల్ఫీ తీసుకున్నారు! మీ ప్రభుత్వం, మాది సిస్టం” అంటూ పోస్టు చేశారు. (ఆర్కైవ్)
ఇలాంటి పోస్ట్‌ను ఇక్కడ చూడవచ్చు.(ఆర్కైవ్)
ఫ్యాక్ట్ చెక్
న్యూస్‌మీటర్ ఈ దావాను పరిశీలించగా, వైరల్ ఫొటోలో ఉన్న వ్యక్తి న్యాయమూర్తి కాదని స్పష్టం అయ్యింది. అతను న్యాయవాది.
మేము కీలక పదాలతో శోధన నిర్వహించగా, Live Law అనే లీగల్ న్యూస్ అవుట్‌లెట్ జూలై 15న లఖనౌ కోర్టులో జరిగిన విచారణను లైవ్ ట్వీట్ల రూపంలో పోస్ట్ చేసింది. వాటి ప్రకారం, ఈ కేసును అదనపు ముఖ్య న్యాయమూర్తి (ACJM) ఆలొక్ వర్మ విచారించారు.
ఈ ఆధారంతో, మేము ఆలొక్ వర్మ ఫొటోలు ఆలహాబాద్ హైకోర్టు మరియు లఖనౌ డిస్ట్రిక్ట్ కోర్టుల వెబ్‌సైట్‌లలో పరిశీలించాము. వీటిలోని ఫొటోలను వైరల్ ఫొటోలోని వ్యక్తితో పోల్చితే ఇద్దరూ వేరు వేరు వ్యక్తులు అని స్పష్టమైంది.
అంతే కాకుండా… సెల్ఫీ తీసిన వ్యక్తి ఎవరు?
జూలై 15న UP Tak ప్రచురించిన వీడియో ప్రకారం, ఆ ఫొటోలో సెల్ఫీ తీసుకుంటున్న వ్యక్తి న్యాయమూర్తి కాదు. ఆయన లక్నోకి చెందిన న్యాయవాది సయ్యద్ మహ్మూద్ హసన్ అని తెలిసింది.
News 24 చానల్‌తో మాట్లాడినప్పుడు హసన్ స్పష్టం చేశారు: “నేను నా కేసు పని కోసం కోర్టుకు వచ్చాను. అప్పటికి రాహుల్ గాంధీ కూడా అక్కడికి వచ్చారు. చాలామంది అతనితో ఫోటోలు తీసుకుంటున్నారు. నా మిత్రుడు నన్ను ఫోటో తీశాడు. ఆ ఫొటోను తర్వాత నా ఫేస్‌బుక్‌లో పెట్టాను. నేను రాహుల్ గాంధీ తరఫు న్యాయవాది కాదు. కోర్టులో నా వ్యక్తిగత పని కోసం వచ్చాను.”
వైరల్ ఫొటోలో కనిపిస్తున్న వ్యక్తి న్యాయమూర్తి కాదు. ఆయన న్యాయవాది. రాహుల్ గాంధీతో అభిమానంగా సెల్ఫీ తీసుకున్న న్యాయమూర్తి అని జరుగుతున్న ప్రచారం తప్పు.
