Fact Check: ಕೇರಳದ ಬಿಎಸ್‌ಎಫ್ ಅಧಿಕಾರಿಯ ಮನೆಯಿಂದ 96 ಕೋಟಿ ನಗದು ವಶಪಡಿಸಿಕೊಂಡ ಸಿಬಿಐ? ವೈರಲ್ ವೀಡಿಯೊದ ಸತ್ಯ ಇಲ್ಲಿದೆ

ಭಾರತ-ಬಾಂಗ್ಲಾದೇಶ ಗಡಿಯಲ್ಲಿ ನಿಯೋಜನೆಗೊಂಡಿದ್ದ ಬಿಎಸ್‌ಎಫ್ ಕಮಾಂಡೆಂಟ್ ಮ್ಯಾಥ್ಯೂ ಅವರ ಕೇರಳದ ಮನೆಯಿಂದ ಸಿಬಿಐ 96 ಕೋಟಿ ನಗದು ಮತ್ತು 76 ಲಕ್ಷ ರೂಪಾಯಿಗಳನ್ನು ಅವರ ಆಸ್ತಿಯಿಂದ ವಶಪಡಿಸಿಕೊಂಡಿದೆ ಎಂಬ ಹೇಳಿಕೆಯೊಂದಿಗೆ, ದೊಡ್ಡ ಪ್ರಮಾಣದ ಕರೆನ್ಸಿ ನೋಟುಗಳನ್ನು ವಶಪಡಿಸಿಕೊಳ್ಳುವ ವೀಡಿಯೊ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗುತ್ತಿದೆ.

ಫೇಸ್​ಬುಕ್ ಬಳಕೆದಾರರೊಬ್ಬರು ಈ ವೀಡಿಯೊವನ್ನು ಹಂಚಿಕೊಂಡು, ‘‘ಬಿಎಸ್ಎಫ್ ಕಮಾಂಡರ್ ಕ್ರಿಶ್ಚಿಯನ್ ಜಿಬು ಮ್ಯಾಥ್ಯೂ ಅವರನ್ನು ಪಶ್ಚಿಮ ಬಂಗಾಳದ ಭಾರತ-ಬಾಂಗ್ಲಾದೇಶ ಗಡಿಯಲ್ಲಿ ನಿಯೋಜಿಸಲಾಗಿದೆ. ಕೇರಳದ ಪಥನಂತಿಟ್ಟದಲ್ಲಿರುವ ಅವರ ಮನೆಯಲ್ಲಿ ಸಿಬಿಐ 96 ಕೋಟಿ ರೂಪಾಯಿ ನಗದು ಮತ್ತು 76 ಲಕ್ಷ ರೂಪಾಯಿಗಳನ್ನು ಅವರ ಆಸ್ತಿಯಿಂದ ವಶಪಡಿಸಿಕೊಂಡಿದೆ. ಈ ದೇಶದ್ರೋಹಿ ಕ್ರಿಶ್ಚಿಯನ್ ದೇಶವನ್ನು ಅಕ್ರಮ ಬಾಂಗ್ಲಾದೇಶಿಗಳು, ರೋಹಿಂಗ್ಯಾಗಳು ಮತ್ತು ಹಸು ಕಳ್ಳಸಾಗಣೆದಾರರಿಂದ.ಲಂಚ ಪಡೀತಿದ್ದ. ಇದರಿಂದ ಭಾರತದಲ್ಲಿ ಅಕ್ರಮ ನುಸುಳುಕೋರರು ಭಾರತದ ತುಂಬಾ ತುಂಬಿಕೊಂಡಿದ್ದಾರೆ’’ ಎಂದು ಬರೆದುಕೊಂಡಿದ್ದಾರೆ. (Archive)

Fact Check

ಈ ಸುದ್ದಿಯ ಸತ್ಯಾಸತ್ಯತೆಯನ್ನು ನ್ಯೂಸ್ ಮೀಟರ್ ಪರಿಶೋದಿಸಿದಾಗ ಸುಳ್ಳು ಹೇಳಿಕೆಯೊಂದಿಗೆ ಈ ವೀಡಿಯೊ ವೈರಲ್ ಆಗುತ್ತಿದೆ ಎಂಬುದು ತಿಳಿದುಬಂದಿದೆ. ಈ ವೀಡಿಯೊ 2018 ರ ಜನವರಿಯಲ್ಲಿ ಉತ್ತರ ಪ್ರದೇಶದ ಕಾನ್ಪುರದಲ್ಲಿರುವ ಉದ್ಯಮಿ ಆನಂದ್ ಖತ್ರಿ ಅವರ ನಿವಾಸದ ಮೇಲೆ ನಡೆಸಲಾದ ದಾಳಿಗೆ ಸಂಬಂಧಿಸಿದೆ.

ನಿಜಾಂಶವನ್ನು ತಿಳಿಯಲು ನಾವು ವೈರಲ್ ವೀಡಿಯೊದ ಪ್ರಮುಖ ಕೀಫ್ರೇಮ್‌ಗಳನ್ನು ಗೂಗಲ್ ಲೆನ್ಸ್ ಸಹಾಯದಿಂದ ಹುಡುಕಿದಾಗ, ಜನವರಿ 17, 2018 ರಂದು NDTV ಇಂಡಿಯಾದ ಯೂಟ್ಯೂಬ್ ಖಾತೆಗೆಅಪ್‌ಲೋಡ್ ಮಾಡಲಾದ ವೀಡಿಯೊ ವರದಿಯನ್ನು ಕಂಡುಕೊಂಡಿದ್ದೇವೆ, ಅದರಲ್ಲಿ ವೈರಲ್ ವೀಡಿಯೊಗೆ ಸಂಬಂಧಿಸಿದ ದೃಶ್ಯಗಳಿವೆ. ಕಾನ್ಪುರದ ಮನೆಯಿಂದ ಸುಮಾರು ₹97 ಕೋಟಿ ಮೌಲ್ಯದ ರದ್ದಾದ ₹500 ಮತ್ತು ₹1,000 ನೋಟುಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ವರದಿ ಹೇಳಿದೆ. ಈ ನೋಟುಗಳು ಹಾಸಿಗೆಯಲ್ಲಿ ರಾಶಿಯಾಗಿ ಕಂಡುಬಂದಿವೆ. ಈ ಕಾರ್ಯಾಚರಣೆಯನ್ನು ಕಾನ್ಪುರದ ಬಿಲ್ಡರ್ ಒಬ್ಬರ ಮನೆಯಲ್ಲಿ ನಡೆಸಲಾಯಿತು.

ನಂತರ ಜನವರಿ 17, 2018 ರಂದು NDTV ಇಂಡಿಯಾದ ವೆಬ್‌ಸೈಟ್‌ನಲ್ಲಿ ಪ್ರಕಟವಾದ ವರದಿಯನ್ನು ನಾವು ಕಂಡುಕೊಂಡೆವು. ಹೋಟೆಲ್‌ನಲ್ಲಿ ತಂಗಿದ್ದ ಪ್ರಮುಖ ಉದ್ಯಮಿಗಳು ಬಚ್ಚಿಟ್ಟ ಹಳೆಯ ನೋಟುಗಳನ್ನು ಸಂಗ್ರಹಿಸಲು ಕೆಲವು ಜನರು ಬಂದಿದ್ದಾರೆ ಎಂಬ ಮಾಹಿತಿ ಕಾನ್ಪುರ ಪೊಲೀಸರಿಗೆ ಬಂದಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ. ಹೋಟೆಲ್‌ನಲ್ಲಿ ಬಂಧಿಸಲ್ಪಟ್ಟವರು ನೀಡಿದ ಮಾಹಿತಿಯ ಆಧಾರದ ಮೇಲೆ, ಪೊಲೀಸರು ಉದ್ಯಮಿ ಮತ್ತು ಬಿಲ್ಡರ್ ಆನಂದ್ ಖತ್ರಿ ಅವರ ಮನೆಯ ಮೇಲೆ ದಾಳಿ ನಡೆಸಿದರು. ಪೊಲೀಸರು ಖತ್ರಿ ಅವರ ಮನೆಯಿಂದ ಸುಮಾರು ₹97 ಕೋಟಿ ಮೌಲ್ಯದ ಹಳೆಯ ಕರೆನ್ಸಿಯನ್ನು ವಶಪಡಿಸಿಕೊಂಡರು.

ನ್ಯೂಸ್ 18 ಕೂಡ ಜನವರಿ 17, 2018 ರಂದು ವೈರಲ್ ವೀಡಿಯೊದ ಸ್ಕ್ರೀನ್ ಶಾಟ್​ನೊಂದಿಗೆ ಸುದ್ದಿ ಪ್ರಕಟಿಸಿದ್ದು, ‘‘ಕಾನ್ಪುರದಲ್ಲಿ ಹಳೆಯ ಕರೆನ್ಸಿಯ ದೊಡ್ಡ ಸಂಗ್ರಹವನ್ನು ವಶಪಡಿಸಿಕೊಳ್ಳಲಾಗಿದೆ. NIA ಮತ್ತು UP ಪೊಲೀಸರು ಈ ಜಂಟಿ ಕಾರ್ಯಾಚರಣೆ ನಡೆಸಿದ್ದು, 97 ಕೋಟಿ ರೂ. ಮೌಲ್ಯದ ಹಳೆಯ ಕರೆನ್ಸಿಯನ್ನು ವಶಪಡಿಸಿಕೊಳ್ಳಲಾಗಿದೆ, ಇದು ನೋಟು ರದ್ದತಿಯ ನಂತರದ ಅತಿದೊಡ್ಡ ನಿಷೇಧಿತ ಕರೆನ್ಸಿಯಾಗಿದೆ. ನಗರದ ಪ್ರಮುಖ ಬಿಲ್ಡರ್ ಮತ್ತು ಜವಳಿ ಉದ್ಯಮಿ ಆನಂದ್ ಖತ್ರಿ ಸೇರಿದಂತೆ 16 ಜನರನ್ನು ಪೊಲೀಸರು ಬಂಧಿಸಿದ್ದಾರೆ’’ ಎಂಬ ಮಾಹಿತಿ ಇದರಲ್ಲಿದೆ.

ನಮ್ಮ ತನಿಖೆಯಲ್ಲಿ ನಾವು ಬಿಎಸ್‌ಎಫ್ ಕಮಾಂಡೆಂಟ್ ಮ್ಯಾಥ್ಯೂ ಬಗ್ಗೆ ಮಾಡಲಾದ ಹೇಳಿಕೆಯನ್ನು ಸಹ ಪರಿಶೀಲಿಸಿದ್ದೇವೆ. ಈ ಸಂದರ್ಭ ಜನವರಿ 31, 2018 ರಂದು ಎನ್‌ಡಿಟಿವಿಯ ವೆಬ್‌ಸೈಟ್‌ನಲ್ಲಿಪ್ರಕಟವಾದ ವರದಿಯನ್ನು ಕಂಡುಕೊಂಡಿದ್ದೇವೆ.

ಕೇರಳದ ಅಲಪ್ಪುಳ ರೈಲು ನಿಲ್ದಾಣದಲ್ಲಿ ರೈಲಿನಿಂದ ಇಳಿಯುವಾಗ ಹಿರಿಯ ಗಡಿ ಭದ್ರತಾ ಪಡೆ (ಬಿಎಸ್‌ಎಫ್) ಅಧಿಕಾರಿ ಜಿಬು ಡಿ. ಮ್ಯಾಥ್ಯೂ ಅವರನ್ನು ₹4.5 ಮಿಲಿಯನ್ (ಸುಮಾರು $1.5 ಮಿಲಿಯನ್) ಹಣದೊಂದಿಗೆ ಸಿಬಿಐ ಬಂಧಿಸಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ. ಮ್ಯಾಥ್ಯೂ ಅವರನ್ನು ಬಿಎಸ್‌ಎಫ್‌ನಲ್ಲಿ ಕಮಾಂಡೆಂಟ್ ಆಗಿ ಭಾರತ-ಬಾಂಗ್ಲಾದೇಶ ಗಡಿಯಲ್ಲಿ ನಿಯೋಜಿಸಲಾಗಿತ್ತು. ಸಿಬಿಐ ತಂಡವು ಎರ್ನಾಕುಲಂ ನಿಲ್ದಾಣದಿಂದ ಶಾಲಿಮಾರ್ ಎಕ್ಸ್‌ಪ್ರೆಸ್ ರೈಲನ್ನು ಹತ್ತಿ ಅವರು ಇಳಿಯುತ್ತಿದ್ದಂತೆ ಬಂಧಿಸಿತು. ಶೋಧದ ಸಮಯದಲ್ಲಿ, ತಂಡವು ನೀಲಿ ಟ್ರಾಲಿ ಬ್ಯಾಗ್‌ನಲ್ಲಿ ಬಟ್ಟೆಯ ಅಡಿಯಲ್ಲಿ ಮರೆಮಾಡಲಾಗಿದ್ದ ₹2,000 ನೋಟುಗಳು ಮತ್ತು ₹500 ನೋಟುಗಳಲ್ಲಿ ಒಟ್ಟು ₹3.44 ಮಿಲಿಯನ್ (ಸುಮಾರು $1.08 ಮಿಲಿಯನ್) ವಶಪಡಿಸಿಕೊಂಡಿದೆ. ವಿಚಾರಣೆಯ ಸಮಯದಲ್ಲಿ, ಮ್ಯಾಥ್ಯೂ ಅವರು ಭಾರತ-ಬಾಂಗ್ಲಾದೇಶ ಗಡಿಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಕಳ್ಳಸಾಗಣೆದಾರರಿಂದ ಹಣವನ್ನು ಲಂಚವಾಗಿ ಪಡೆದಿರುವುದಾಗಿ ಬಹಿರಂಗಪಡಿಸಿದರು.

ಹೀಗಾಗಿ ಈ ಎಲ್ಲ ಮಾಹಿತಿಯ ಆಧಾರದ ಮೇಲೆ, ಬಿಎಸ್‌ಎಫ್ ಅಧಿಕಾರಿ ಜಿಬು ಮ್ಯಾಥ್ಯೂ ಅವರ ಕೇರಳದ ಮನೆಯಿಂದ ₹96 ಕೋಟಿ ನಗದು ಪತ್ತೆಯಾಗಿದೆ ಎಂದು ವೈರಲ್ ಆಗುತ್ತಿರುವ ವೀಡಿಯೊ, ವಾಸ್ತವವಾಗಿ ಸುಮಾರು ಎಂಟು ವರ್ಷಗಳ ಹಿಂದೆ ಕಾನ್ಪುರದಲ್ಲಿ ಬಿಲ್ಡರ್ ಒಬ್ಬರ ಮನೆಯಲ್ಲಿ ನಡೆದ ದಾಳಿಯಿಂದ ₹97 ಕೋಟಿ ಮೌಲ್ಯದ ಹಳೆಯ ನೋಟುಗಳು ಪತ್ತೆಯಾಗಿವೆ ಎಂಬುದು ಸ್ಪಷ್ಟವಾಗಿದೆ. ಆದಾಗ್ಯೂ, 2018 ರಲ್ಲಿ, ಸಿಬಿಐ ಕೇರಳದ ಅಲಪ್ಪುಳದಲ್ಲಿ ₹4.5 ಮಿಲಿಯನ್‌ನೊಂದಿಗೆ ಬಿಎಸ್‌ಎಫ್ ಕಮಾಂಡೆಂಟ್ ಮ್ಯಾಥ್ಯೂ ಅವರನ್ನು ಬಂಧಿಸಿತ್ತು.