Fact Check: കാന്താര സിനിമ കാണാന്‍ വ്രതമെടുത്ത് പോകണമെന്ന് അണിയറപ്രവര്‍ത്തകര്‍ പറഞ്ഞോ? പോസ്റ്ററിന്റെ സത്യമറിയാം
കാന്താര സിനിമ ഒക്ടോബര്‍ 2ന് പുറത്തിറങ്ങാനിരിക്കെ തിയറ്ററില്‍ ചിത്രം കാണാനെത്തുന്നവര്‍ അന്നേദിവസം മദ്യപിക്കാനോ പുകവലിക്കാനോ മാംസാഹാരം കഴിക്കാനോ പാടില്ലെന്ന് സിനിമാപ്രവര്‍ത്തകര്‍ ഔദ്യോഗികമായി അറിയിച്ച തരത്തിലാണ് സമൂഹമാധ്യമങ്ങളില്‍ പ്രചാരണം.
By - HABEEB RAHMAN YP
Claim:കാന്താര സിനിമ കാണാന്‍ പോകുന്നവര്‍ അന്നേദിവസം മദ്യപിക്കരുതെന്നും പുകവലിക്കരുതെന്നും മാംസാഹാരം കഴിക്കരുതെന്നും അണിയറ പ്രവര്‍ത്തകരുടെ നിര്‍ദേശം.
Fact:പ്രചാരണം അടിസ്ഥാനരഹിതം. ഇത്തരമൊരു നിര്‍ദേശവും സിനിമയുടെ അണിയറ പ്രവര്‍ത്തകരില്‍നിന്ന് ഉണ്ടായില്ലെന്ന് സംവിധായകനും നടനുമായ ഋഷഭ് ഷെട്ടി വ്യക്തമാക്കി
കാന്താര സിനിമ പുറത്തിറങ്ങാനിരിക്കെ ചിത്രം കാണാനെത്തുന്നവര്‍ അന്നേദിവസം വ്രതമനുഷ്ഠിക്കണമെന്ന തരത്തില്‍ സമൂഹമാധ്യമങ്ങളില്‍ പ്രചാരണം. സിനിമ കാണുന്ന ദിവസം മദ്യപിക്കാന്‍ പാടില്ലെന്നും പുകവലിക്കരുതെന്നും മാംസാഹാരം കഴിക്കരുതെന്നും സിനിമയുടെ അണിയറപ്രവര്‍ത്തകര്‍ പറഞ്ഞ രൂപത്തിലാണ് പ്രചാരണം.
Fact-check:
പ്രചാരണം വ്യാജമാണെന്നും സിനിമയുടെ അണിയറ പ്രവര്‍ത്തകര്‍ ഇത്തരമൊരു നിര്‍ദേശം നല്‍‍കിയിട്ടില്ലെന്നും അന്വേഷണത്തില്‍ വ്യക്തമായി.
പ്രചരിക്കുന്ന പോസ്റ്റര്‍ സൂക്ഷ്മമായി പരിശോധിച്ചെങ്കിലും ഇത് ആധികാരികമാണെന്ന് വ്യക്തമാക്കുന്ന സൂചനകളൊന്നും ലഭിച്ചില്ല. നിര്‍ദേശങ്ങള്‍ പാലിക്കാന്‍ സന്നദ്ധതയറിയിച്ച് ഗൂഗ്ള്‍ ഫോം പൂരിപ്പിച്ച് നല്‍കാനും പോസ്റ്ററില്‍ പറയുന്നതായി കാണാമെങ്കിലും ഇത്തരം ഫോമുകളുടെ ലിങ്കുകളോ പ്രചരിക്കുന്ന പോസറ്ററുകളോ ചിത്രവുമായി ബന്ധപ്പെട്ട സമൂഹമാധ്യമ പേജുകളിലൊന്നും കണ്ടെത്താനായില്ല.
തുടര്‍ന്ന് കീവേഡുകള്‍ ഉപയോഗിച്ച് നടത്തിയ പരിശോധനയില്‍ ചില മാധ്യമ റിപ്പോര്‍ട്ടുകള്‍ ലഭിച്ചു. 2025 ഡിസംബര്‍ 23 ന് മനോരമ ഓണ്‍ലൈനില്‍ പ്രസിദ്ധീകരിച്ച റിപ്പോര്‍ട്ടില്‍ പ്രചാരണം വാജമാണെന്ന് ചിത്രത്തിന്റെ സംവിധായകനും നടനുമായ ഋഷഭ് ഷെട്ടി വ്യക്തമാക്കിയതായി പറയുന്നു.
ദേശാഭിമാനി ഓണ്‍ലൈന്‍ ഉള്‍പ്പെടെ വിവിധ മലയാളം മാധ്യമങ്ങളില്‍ ഈ വാര്‍ത്ത റിപ്പോര്‍ട്ട് ചെയ്തതായി കണ്ടെത്തി. ഡെക്കാന്‍ ക്രോണിക്കള്‍ അടക്കം വിവിധ ദേശീയ മാധ്യമങ്ങളും ഈ വാര്‍ത്ത റിപ്പോര്‍ട്ട് ചെയ്തിട്ടുണ്ട്.
ഈ റിപ്പോര്‍ട്ടുകളുടെയെല്ലാം അടിസ്ഥാനം ഋഷഭ് ഷെട്ടി ബംഗലൂരുവില്‍ നടത്തിയ ഒരു വാര്‍ത്താസമ്മേളനമാണ്. സിനിമയുടെ പ്രൊമോഷനുമായി ബന്ധപ്പെട്ട് നടത്തിയ വാര്‍ത്താസമ്മേളനത്തിന്റെ ദൈര്‍ഘ്യമേറിയ പതിപ്പ് യൂട്യൂബില്‍ കണ്ടെത്തി.
വാര്‍ത്താസമ്മേളനം പരിശോധിച്ചതോടെ പ്രചാരണം അടിസ്ഥാനരഹിതമാണെന്നും സിനിമയുടെ അണിയറപ്രവര്‍ത്തകരുടെ ഭാഗത്തുനിന്നും ഇത്തരമൊരു നിര്‍ദേശവും പുറപ്പെടുവിച്ചിട്ടില്ലെന്നും വ്യക്തമായി.
Conclusion:
2025 ഒക്ടോബറില്‍ പുറത്തിറങ്ങാനിരിക്കുന്ന കാന്താര സിനിമ കാണാന്‍ വ്രതമനുഷ്ഠിക്കണമെന്നും അന്നേദിവസം മദ്യപിക്കുകയോ പുകവലിക്കുകയോ ചെയ്യരുതെന്നും മാംസാഹാരം കഴിക്കരുതെന്നും സിനിമയുടെ അണിയറ പ്രവര്‍ത്തകര്‍ നിര്‍ദേശിച്ചതായി സമൂഹമാധ്യമങ്ങളില്‍ പ്രചരിക്കുന്ന സന്ദേശം വ്യാജമാണ്. ഇത്തരമൊരു നിര്‍ദേശവും പുറത്തുവിട്ടില്ലെന്ന് സിനിമയുടെ സംവിധായകനും നടനുമായ ഋഷഭ് ഷെട്ടി ബംഗലൂരുവില്‍ വാര്‍ത്താസമ്മേളനത്തില്‍ വ്യക്തമാക്കിയതായി വസ്തുത പരിശോധനയില്‍ സ്ഥിരീകരിച്ചു.
