Fact Check: ഒളിഞ്ഞിരിക്കുന്ന നമ്പര്‍ കണ്ടെത്തിയാല്‍ സൗജന്യ സ്മാര്‍ട്ട്ഫോണ്‍ - തട്ടിപ്പ് തിരിച്ചറിയാം
നല്‍കിയിരിക്കുന്ന അക്കങ്ങളില്‍ ഒളിഞ്ഞിരിക്കുന്ന വ്യത്യസ്തമായ സംഖ്യ കണ്ടെത്തിയാല്‍ സൗജന്യമായി ഓപ്പോയുടെ സ്മാര്‍ട്ട്ഫോണ്‍ സമ്മാനം ലഭിക്കുമെന്ന തരത്തില്‍ പ്രചരിക്കുന്ന സന്ദേശത്തിന് ചുവടെ നിരവധി പേരാണ് ഇത്തരത്തില്‍ കമന്റുകള്‍ പങ്കുവെച്ചിരിക്കുന്നത്.
By - HABEEB RAHMAN YP
Claim:ഒളിഞ്ഞിരിക്കുന്ന നമ്പര്‍ കണ്ടെത്തി സ്മാര്‍ട്ട്ഫോണ്‍ സമ്മാനം നേടാം
Fact:പ്രചാരണം വസ്തുതാവിരുദ്ധം. പ്രചരിക്കുന്നത് വ്യാജ സന്ദേശമാണെന്നും ഉപയോക്താക്കളെ തെറ്റിദ്ധരിപ്പിച്ച് വ്യക്തിഗത വിവരങ്ങള്‍ സംഘടിപ്പിക്കാനും സാമ്പത്തിക തട്ടിപ്പുകള്‍ക്കും ലക്ഷ്യമിട്ടാണ് പ്രചാരണമെന്നും അന്വേഷണത്തില്‍ വ്യക്തമായി.
സൗജന്യമായി സ്മാര്‍ട്ട്ഫോണ്‍ സ്വന്തമാക്കാന്‍ അവസരമെന്ന തരത്തില്‍ ചില പേജുകള്‍ സമൂഹമാധ്യമങ്ങളില്‍ വ്യാപകമാകുന്നു. ലളിതമായ പ്രശ്നോത്തരികളിലൂടെയും ഗെയിമുകളിലൂടെയും മറ്റും വിജയിച്ച് സമ്മാനമായി സ്മാര്‍ട്ട്ഫോണ്‍ നേടാമെന്നാണ് അവകാശവാദം. ഒളിഞ്ഞിരിക്കുന്ന നമ്പര്‍ കണ്ടെത്തി ഓപ്പോയുടെ സ്മാര്‍ട്ട്ഫോണ്‍ സമ്മാനം നേടാമെന്ന തരത്തിലാണ് പ്രചാരണം.
Fact-check:
പ്രചാരണം അടിസ്ഥാനരഹിതമാണെന്നും സാമ്പത്തിക തട്ടിപ്പ് ലക്ഷ്യമിട്ടാണ് പ്രചാരണമെന്നും അന്വേഷണത്തില്‍ വ്യക്തമായി.
പ്രചരിക്കുന്ന സന്ദേശം പങ്കുവെച്ചിരിക്കുന്ന പേജാണ് ആദ്യം പരിശോധിച്ചത്. Phone Mal എന്ന പേരിലുള്ള ഈ പേജിന്റെ വിശദാംശങ്ങള്‍ പരിശോധിച്ചതോടെ ഈ സന്ദേശം പങ്കുവെച്ച 2025 മാര്‍ച്ച് 16-ന് മാത്രമാണ് പേജ് തയ്യാറാക്കിയിരിക്കുന്നതെന്ന് കണ്ടെത്തി. ഇതോടെ തട്ടിപ്പിനായി തയ്യാറാക്കിയ പേജായിരിക്കാം ഇതെന്ന സൂചന ലഭിച്ചു.
തുടര്‍ന്ന് നടത്തിയ പരിശോധനയില്‍ പോസ്റ്റിന് താഴെ ശരിയുത്തരം കമന്റ് രേഖപ്പെടുത്തിയവര്‍ക്ക് മെസഞ്ചറില്‍ സന്ദേശം നല്‍കിയിട്ടുണ്ടെന്ന് പേജിന്റെ അക്കൗണ്ടില്‍നിന്ന് മറുപടി നല്‍കിയതായി കണ്ടെത്തി. ഇതോടെ മറ്റൊരു അക്കൗണ്ട് ഉപയോഗിച്ച് ഇത്തരത്തില്‍ കമന്റ് രേഖപ്പെടുത്തുകയും മെസഞ്ചറില്‍ ബന്ധപ്പെടുകയും ചെയ്തു.
മെസഞ്ചറില്‍ അയക്കുന്ന സന്ദേശങ്ങളെല്ലാം ഗൂഗ്ള്‍ ട്രാന്‍സലേറ്റ് ഉപയോഗിച്ച് മുന്‍കൂട്ടി തയ്യാറാക്കിയവയാണെന്ന് വ്യക്തമായി. സമ്മാനത്തിന് അര്‍ഹനാണെന്നും ബന്ധപ്പെടാനായി ഫോണ്‍ നമ്പര്‍ പങ്കുവെയ്ക്കണമെന്നുമാണ് തുടര്‍ന്നുള്ള സന്ദേശം. പിന്നീട് ഫോണില്‍ ബന്ധപ്പെടാനാവുന്നില്ലെന്ന് വിശ്വസിപ്പിച്ച് ഗിഫ്റ്റ് കോഡ് എന്ന പേരില്‍ ഫോണില്‍ ലഭിക്കുന്ന ഒടിപി ഉള്‍പ്പെടെ വിവരങ്ങള്‍ നേടിയെടുക്കുകയാണ് തട്ടിപ്പിന്റെ രീതി.
ഇത്തരം തട്ടിപ്പുകള്‍ക്കെതിരെ ഓപ്പോ ഉള്‍പ്പെടെ സ്മാര്‍ട്ട്ഫോണ്‍ കമ്പനികള്‍ നേരത്തെ തന്നെ രംഗത്തെത്തിയിട്ടുണ്ട്. മുന്‍വര്‍ഷങ്ങളില്‍ സമാനപ്രചാരണം ഉണ്ടായ സമയത്ത് ഓപ്പോ എക്സില്‍ പങ്കുവെച്ച വിശദീകരണം ലഭ്യമായി.
ഇത്തരം മത്സരങ്ങള്‍ ഔദ്യോഗികമായി നടത്തുന്നുണ്ടെങ്കില്‍ അത് വെരിഫൈ ചെയ്ത ഓപ്പോയുടെ ഔദ്യോഗിക അക്കൗണ്ടിലൂടെ മാത്രമായിരിക്കുമെന്ന് കമ്പനി വ്യക്തമാക്കുന്നു. നിലവില്‍ പ്രചരിക്കുന്ന തരത്തില്‍ യാതൊരു മത്സരപദ്ധതികളും ഈ പേജില്‍ പങ്കുവെച്ചിട്ടില്ലെന്നും സ്ഥിരീകരിച്ചു.
നേരത്തെ ഇത്തരം തട്ടിപ്പുകള്‍ സജീവമായ സമയത്ത് കേരള പൊലീസും മുന്നറിയിപ്പുകള്‍ നല്‍കിയിരുന്നു. 2023 ഏപ്രിലിലില്‍ കേരള പൊലീസ് നല്‍കിയ ഇത്തരമൊരു മുന്നറിയിപ്പ് സന്ദേശത്തിലും ഈ തട്ടിപ്പുരീതികള്‍ വിശദീകരിക്കുന്നുണ്ട്.
ഇതോടെ പ്രചാരണം വ്യാജമാണെന്ന് വ്യക്തമായി.
Conclusion:
ചിത്രത്തില്‍ ഒളിഞ്ഞിരിക്കുന്ന നമ്പര്‍ കണ്ടെത്തി ഓപ്പോയുടെ സ്മാര്‍ട്ട്ഫോണ്‍ സമ്മാനം നേടാമെന്ന തരത്തില്‍ പ്രചരിക്കുന്ന സന്ദേശം വ്യാജമാണ്. ഉപയോക്താക്കളെ കബളിപ്പിച്ച് വ്യക്തിഗത വിവരങ്ങള്‍ തട്ടിയെടുക്കാനും അതുവഴി സാമ്പത്തിക തട്ടിപ്പുകളും നടത്താന്‍ ലക്ഷ്യമിട്ടാണ് പ്രചാരണമെന്നും അന്വേഷണത്തില്‍ വ്യക്തമായി.
