Fact Check: నిజానికి వీడియోలో దాండియా ఆడుతున్న వ్యక్తి వికాస్ మహంతే, ఇతను ప్రధాని మోదీని పోలి ఉంటాడు

నవరాత్రి పండుగ ప్రారంభానికి ముందు 14 అక్టోబర్ 2023 శనివారం నాడు ప్రధాని నరేంద్ర మోడీ రాసిన గర్బా పాటను కలిగి ఉన్న మ్యూజిక్ వీడియో విడుదల చేయబడింది. చాలా సంవత్సరాల క్రితం ప్రధాని రచించిన 190 సెకన్ల పాటను ప్రధాని మోదీ తన సోషల్ మీడియా టైమ్‌లైన్‌లో షేర్ చేశారు.

ఇది ఇలా ఉంటె, ప్రధాని నరేంద్ర మోదీ దాండియా ఆడుతున్నట్లు చూపుతున్న వీడియో సోషల్ మీడియాలో వైరల్ అవుతోంది.

"మోడీ దాండియా ఆడుతున్న దృశ్యం" అంటూ ఒక వీడియో సోషల్ మీడియాలో ఫుల్ వైరల్ అవుతోంది.

ప్రధాని మోదీ నిజంగా దాండియా ఆడి గర్బా డ్యాన్స్ చేశారా..రండి నిజం తెలుసుకుందాం.

న్యూస్‌మీటర్ వీడియో తప్పుదారి పట్టించేదిగా గుర్తించింది. వీడియోలో డ్యాన్స్ చేస్తున్న వ్యక్తి ప్రధాని మోదీ కాదు అని కనుగొంది.
అలాంటి కార్యక్రమంలో ప్రధాని మోదీ దాండియా ఆడినట్లు మాకు ఎలాంటి వార్త కనిపించలేదు.

అయితే వైరల్ వీడియోలో డ్యాన్స్ చేస్తున్న వ్యక్తి గుజరాత్‌కు చెందిన వ్యాపారవేత్త మరియు కళాకారుడు వికాస్ మహంతే అని మేము కనుగొన్నాము, అతను ప్రధాని నరేంద్ర మోడీని పోలి ఉంటాడు.

వైరల్ వీడియో గురించి మరింత శోధించిన తర్వాత, నవంబర్ 7న, 2023లో వికాస్ మహంతే అధికారిక ఇన్‌స్టాగ్రామ్ ఖాతాలో షేర్ చేయబడిన వీడియోను మేము కనుగొన్నాము.

లండన్‌లో జరిగిన 'దీపావళి మేళా'కు ఆయనను ముఖ్య అతిథిగా ఆహ్వానించినట్లు వీడియోలో పేర్కొన్నారు.

వికాస్ మహంతే డ్యాన్స్ చేస్తున్న వీడియో లండన్‌లో జరిగిన ఆ ఈవెంట్‌కి సంబంధించినది. ఇదే వీడియోను ప్రధాని మోదీ డ్యాన్స్ చేస్తున్నట్టు సోషల్ మీడియాలో షేర్ చేశారు.

ప్రధాని మోదీని పోలి ఉండడం వల్ల మహంతే అనుకోకుండా తనను తాను వెలుగులోకి తెచ్చుకున్నారు. అతని అసాధారణ సారూప్యత ఆరాధకుల కుటుంబ సర్కిల్‌లో దీపావళికి ముందు జరిగే ఉత్సవాల్లో పాల్గొనడానికి లండన్‌కు ఆహ్వానం అందేలా చేసింది. ఈ క్రమంలోనే మహంతేని మోదీగా తప్పుగా గుర్తించి గర్బా డ్యాన్స్‌లో పాల్గొంటున్నట్లు చిత్రీకరించడం సంచలనం రేపింది.

సర్క్యులేట్ అవుతున్న వీడియో క్లిప్‌లలో కీలకమైన సందర్భం లేకపోవడంతో చాలా మంది వీక్షకులు ప్రధాని మోదీ డ్యాన్స్‌లో పాల్గొన్నారని తప్పుగా నమ్ముతున్నారు.

ఈ గందరగోళాన్ని పరిష్కరిస్తూ వీడియో ప్రకటనలో వికాస్ మహంతే, గర్బా డ్యాన్స్ వీడియోలో ఉన్నది ప్రధాని మోదీ కాదని, తానేనని స్పష్టం చేశారు.

కాబట్టి, వైరల్ గర్బా డ్యాన్స్ వీడియోలో ఉన్న వ్యక్తి ప్రధాని మోదీ కాదని, మోదీని పోలి ఉండే వికాస్ మహంతే అని మేము నిర్ధారించాము.