Fact Check: ఆంధ్రప్రదేశ్ ప్రభుత్వాన్ని సమావేశానికి ఆహ్వానిస్తూ హోం మంత్రిత్వ శాఖ నుండి వచ్చిన లేఖ వాస్తవానికి 2022 సంవత్సరానికి చెందినది

ఆంధ్రప్రదేశ్‌లో ఎన్నికలు సమీపిస్తున్న తరుణంలో ఈ ప్రత్యేక కేటగిరీ హోదా [SCS] అంశం కీలకంగా మారింది.

అయితే, దీనికి సంబంధించి ఓ వీడియో సోషల్ మీడియాలో వైరల్ అవుతోంది.

"సీఎం జగన్ పోరాటానికి దిగివచ్చిన కేంద్రం
ఏపీ సీఎస్ కు కేంద్ర హోంశాఖ లేఖ
కేంద్ర హోంశాఖ ఎజెండాలో ఏపీ ప్రత్యేక అంశం
ఈ నెల 17న చర్చలకు రావాలని ఆహ్వానం" అని పేర్కొంటూ ఓ విడియో [ ఆర్కైవ్ లింక్ ] సోషల్ మీడియాలో వైరల్ అవుతోంది.

దీని వెనుక ఉన్న నిజాన్ని తెలుసుకుందాం రండి.

నిజ నిర్ధారణ:

షేర్ చేయబడిన వీడియో వాస్తవానికి 2022 సంవత్సరానికి చెందినదని న్యూస్‌మీటర్ కనుగొంది.

మేము 'ఏపీ సీఎస్ కు హోం మంత్రిత్వ శాఖ లేఖ' అనే కీలక పదాలను ఉపయోగించి కీవర్డ్ శోధనను నిర్వహించినప్పుడు, TV9 ఛానెల్ ద్వారా ప్రసారమైన వార్తను కనుగొన్నాము, నిజానికి అది 12వ ఫిబ్రవరి, 2022లో ప్రచురించబడింది.

వైరల్ వీడియోను పరిశీలించినప్పుడు, మేము కనుగొన్న వార్తా ప్రసారంలో చిన్న భాగం ఉపయోగించబడిందని మరియు పోస్ట్‌లోని మిగిలిన భాగం సవరించబడిందని మేము అర్థం చేసుకున్నాము.

2022లో జరిగిన పార్లమెంట్‌ సమావేశాల్లో ఆంధ్రప్రదేశ్‌కి ప్రత్యేక హోదాతో పాటు, మరికొన్ని డిమాండ్‌లతో YSRCP ఎంపీలు తమ గళాన్ని వినిపించారు.

ఈ సంఘటనకు ప్రతిస్పందనగా హోం మంత్రిత్వ శాఖ Andhra Pradesh Reorganisation Act, 2014 నుండి ఉత్పన్నమైన, AP & TS మధ్య పెండింగ్‌లో ఉన్న సమస్యలపై చర్చించడానికి వీడియో కాన్ఫరెన్స్ ద్వారా 17వ ఫిబ్రవరి 2022లో సమావేశానికి ఆంధ్రప్రదేశ్ మరియు తెలంగాణ ప్రభుత్వాలను ఆహ్వానిస్తూ లేఖ పంపింది.

ప్రత్యేక హోదా, AP మరియు TSల మధ్య పెండింగ్‌లో ఉన్న విద్యుత్ బిల్లులు మరియు మరికొన్ని పెండింగ్‌లో ఉన్న అంశాలు, సమావేశం యొక్క ఎజెండా అని లేఖలో పేర్కొన్నారు.

కాబట్టి, ఇప్పుడు సోషల్ మీడియాలో వైరల్ అవుతున్న వీడియో తప్పుదారి పట్టించేది అని, వాస్తవానికి ఆ వీడియో 12వ ఫిబ్రవరి 2022లో TV9 ప్రచురించిన హోం మంత్రిత్వ శాఖ పంపిన లేఖకు చెందినదని మేము నిర్ధారించాము.